Ikuallaavik kinguaattoortoq
Suliniut 400 millioninik koruuninik akeqartoq kinguaattoorpoq, suliffeqarfinnik Kalaallit Nunaata ikuallaasarfissaannik nutaanik marlunnik sanaartorusuttunik pissarsinissaq ajornakusoormat.
Kalaallit Nunaanni eqqaavissuit eqqakkanik ulikkaarput. Arlalinni ajornartorsiutaavoq, ilaatigut Kujataani, eqqakkat katersorneqarsimasut ajornanngitsumik anorimit tingitaasinnaammata sumullu tamaanga eqqaavissuit eqqaannut siaruartarlutik.
Aviisi Sermitsiaq taama allappoq.
Kommunit eqqagassalereqatigiiffiata Esanip tamanna iliuuseqarfiginialerpaa, taamatut neriorsuivoq Esanimi psiortaq Frank Pedersen.
Eqqakkat qaleriiaat annertusiartorput ikuallaasarfiit piginnaasaasa naammannginnerat pissutigalugu, aamma piffissaq sivisooq ingerlassaaq Kalaallit Nunaanni eqqakkat tamarmik ikuallanneqarsinnaalernissaasa tungaannut.
Nuummi Sisimiunilu nutaanik marlunnik qitiusunik Kalaallit Nunaannut tamarmut atuuttussanik ikuallaasarfeqalernissaa pilersaarutaavoq. Aallaqqaammut pilersaarutaasimagaluarpoq Nuummi ikuallaasarfiup septembarimi 2023-mi naammassineqarsimanissaa, aamma Sisimiuniittussap januaarimi 2024-mi. Ikuallaasarfissanut aningaasaliissutit juullinngitsorli kalaallit aningaasaateqarfii marluk isumaqatigiissuteqarfigalugit inissinneqareerput.
Sanaartugassat 400 millionillit
Kisianni entreprenørinik, piffissaqartunik, piginnaaneqartunik aamma sanaartornissamik suliassamut annertuumut 400 millioninik koruuninik nalilimmut neqeroorusuttunik, pissarnissaq ajornakusoorsimavoq, maannalu pisortap Frank Pedersenip naatsorsuutigaa 2024-p ingerlanerani tamanna siusinnerpaamik pisinnaasoq.
- Maannakkut naatsorsuutigaarput Nuummi ikuallaasarfiup nutaap 2024-p aallartilaarnerani naammassineqarnissaa, Sisimiuniittullu qaammatit arfineq-marluk qaangiunneranni, Frank Pedersen Sermitsiamut oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: