Politikerit meeqqat angerlarsimaffiup
avataanut inissinnagit ilaqutariit ikiorniarlugit qanoq iliussanersut
Kommuneqarfik Sermersuumi qinersisartunik ataatsimiititsinerni
apeqquterpassuarnik apeqquteqarfigineqartarput.
- Inuppassuit meeqqat angerlarsimaffiup
avataanut inissinnissaat inuiaqatigiinnut akisoqimmat kissaatiginagu
ilaqutariinnut ikiorsiinissaq ujartorpaat, Steven Arnfjord oqarpoq. Kommunini
politikerit meeqqat angerlarsimaffiup avataanut inissinnagit ilaqutariinnut
politikkeqalernissaanik aallussissasut taanna isumaqarpoq.
Politikerit meeqqat angerlarsimaffiup
avataanut inissinnagit ilaqutariit ikiorniarlugit qanoq iliussanersut
Kommuneqarfik Sermersuumi qinersisartunik ataatsimiititsinerni
apeqquterpassuarnik apeqquteqarfigineqartarput.
- Inuppassuit meeqqat angerlarsimaffiup
avataanut inissinnissaat inuiaqatigiinnut akisoqimmat kissaatiginagu
ilaqutariinnut ikiorsiinissaq ujartorpaat, Steven Arnfjord oqarpoq. Kommunini
politikerit meeqqat angerlarsimaffiup avataanut inissinnagit ilaqutariinnut
politikkeqalernissaanik aallussissasut taanna isumaqarpoq.
- Ilaqutariinnut sullissinerup
annertunerusumik aallunneqalernissaa periarfissatsialaavoq. Tassa imaappoq,
ulluunerani paaqqinnittarfimmit, meeqqat atuarfiannit, atuareernerup kingorna
ornittakkamit allamiilluunniit nalunaaruteqartoqaraangat ernumassuteqartoqaraangalluunniit ilaqutariit qanoq ikiorneqarsinnaanersut
ingerlaannaq nalilerneqartariaqarpoq, Steven Arnfjord oqarpoq.
Meeqqat angerlarsimaffiup avataanut
inissinneqarsimasut atugarliornerusartut taanna nassuiaavoq.
- Meeqqat angerlarsimaffiup avataanut
inissinneqartarnerat iluaqutaanngilaq. Tamanna oqallisigineqaqattaartarsimavoq,
meeqqallu angerlarsimaffiup avataanut inissinneqarsimasut atugarliornerusarput.
Tamannalu aamma akisungaatsiarpoq. Pissutsini aalajangersimasuni
angerlarsimaffiup avataanut inissiinissaq pisariaqartarpoq, Ilaqutariilli
ulluinnarni pitsaanerusumik inuuleqqinniassammata ikiorneqarnissaat pillugu
kommunit siusissukkut iliuuseqarnissamik ilaqutariinnillu ajornartorsiutilinnut
ikiuiniarnermik aallussisariaqarput. Sinneri tamarmik aningaasatigut
misigissutsikkullu akisuujusarput, Steven Arnfjord oqarpoq.
Angerlarsimaffeqanngitsunut inatsisit
amigaataasut
Nuummi qinersisartunik
ataatsimiititsinermi kingullermi, kommunimut qinersinermut atatillugu sapaatip
akunnerani kingullermi tallimanngornermi ingerlanneqartumi,
angerlarsimaffeqanngitsut ilaat politikerinit qanoq ikiorneqarniarnerlutik
aperipput. Kalaallit Nunaat angerlarsimaffeqanngitsut pillugit inatsisinik
amigaateqartoq Steven Arnfjord isumaqarpoq.
- Angerlarsimaffeqanngitsut imaluunniit
unnuisarfimmik qanoq ingerlatsisoqarsinnaanera pillugu inatsiseqanngilaq.
Kommuni siuttuulluni unnuisarfimmik qanoq ingerlatsisoqarsinnaaneranut
najoqqutassiortariaqarpoq. Politikkikkut suliniuteqartoqartariaqarpoq, utaqqiisaasumillu
inissialiortoqarsinnaaniassammat kommunimi politikerit Naalakkersuisut
Namminersorlutillu Oqartussat qanimut suleqatigisariaqarpaat.
- Angerlarsimaffeqanngitsunut unnuisarfinnik ingerlatsineq pillugu
inatsiseqannginnera pissutigalugu kommunit suliassat pitsaasumik
suliariniarlugit namminneq periusissiortariaqarput. Kommunini politikerit
eqqortumik aalajangiisinnaaniassagamik Issittumi Atugarissaarneq pillugu
ilisimatusarfimmi immikkut ilisimasalinnik oqaloqateqarnissaminnut
tikilluaqqusaapput, Steven Arnfjord oqarpoq.
Allannguinissaq ajornakusoorsinnaasoq
- Allannguinissaq ajornakusooqisoq Steven
Arnfjord oqarpoq, kommunillu sulisussanik ilinniarsimasunik
sulilersitsinissartik unammillernartittaraat tikkuarpaa.
- Atugarissaarnermut tunngasuni qitiusumik
atorfiit, soorlu ilinniartitsisut, isumaginninnermut siunnersortit,
peqqissaasut ingammillu perorsaasut atorfinitsinnissaat kommunit
ajornakusoortittarpaat. Aningaasarsiat qaffanneqartariaqarlutillu sulinermi
atugassarititaasut pitsanngorsarneqartariaqarput, ilaatigut ilinniarluarsimasunik aqutsisoqarnikkut.
Aningaasarsiat aqutsisullu pitsaappata illumi pisoqalisimasumi sulinissaq
naammaginarsinnaavoq, Steven Arnfjord oqarpoq.
Kommunalbestyrelsimut qinigaasussat
suliassaminnut piffissaqarnissamik pilersaarusiornissamillu aallusseqqullugit
kajumissaarpai.
- Kommunimi politikerit kommunimi
suliniutit pilersaarusiorluarnerannut, atuutilersinnissaannut
nalilersuinissaannullu piffissaqarnissaq aalluttariaqarpaat. Tamanna
piffissartornartarpoq akunnerpassuarnillu suliarineqartussaalluni, tamannali
silatusaartumik aallussineruvoq. Suliniutit amerlasuut
malittareqqiivigineqarneq ajorput, ukiualuillu qaangiukkaangata
illoqarfimmiluunniit allami suliniutinik assingusunik
aallartitsisoqaqqittarpoq. Tamanna nukissanik atulussineruvoq, Steven Arnfjord
oqarpoq.
