Ilisimatooq: Uuliasiorfissuit aqutsisunngussapput
Nunanit allaniit uuliasiorfissuit nakkutiginissaat Kalaallit Nunaannut ajornakusuulersinnaavoq. Uulisiorfissuit taama pissaaneqartigisut nakkutiginiassagaanni misilittagartuujusariaqarpoq, naalakkiisinnaassuseqarluni pituttugaannginnitsuusariaqarlunilu, Norgemi ilisimatooq oqarpoq.
Helge Rygvikk, Olo Universitetimi uuliasiornermi isumannaallisaanermik inatsisiliornermillu ilisimatooq isumaqarpoq, uuliasiorniarluni maleruagassat apeqqutaasartut, tassaasulli isumannaallisaanerup ingerlanneqarnera qanorlu ittuunera suliffeqarfinnut oqartussaasunullu ilisarnaataasartut.
Namminersorlutik Oqartussani Cairn Energy piumaffigineqarpoq Norgemi Nordsømi maleruagassat malillugit qillerisoqassasoq, taakkuusullu nunarsuarmi sakkortunerpaajusut Namminersorlutik Oqartussat naapertorlugit.
Aatsitassanullu pisortaqarfiup atuuffippassui uuliasiorfissuarnullu ingalassimaarnissaq annertuumik ajornartorsiutaalersinnaapput, aviisi Informationimi naliliivoq.
- Kalaallit Nunaat mikisuulluni sanngiitsumik allaffissornermi ingerlatsisoq suliffissuarnut taama pissaaneqartigisunut uuliasiorfissuarnut akiuussinnaanngilaq. Uuliasiorfissuit aqutsisuulissapput.
- Ajuallatsitsinianngilanga, uulisiorfissuilli misissuineranni piiaanerannilu aqunnissaannut pisariaqarpoq sukumiisumik ilisimasaqarlunilu attuumassuteqartuunnginnissaq. Uuliasiorfiit aqutsilersussaassapput, Helge Rygvikk oqarpoq, ullunilu makkunanerpiaq nalunaarusiaq USA-mi ilisimatuut peqatigalugit Nordsømi Mexicollu kangerliumanersuani isumannaallisaanermik nakkutilliinerit imminnut assersuunneranik imaqartoq naammassilerlugu.