Ilisimatusarnermut millionilikkaat tunniunneqarput

Nunatsinni Ilisimatusarnermik Siunnersuisoqatigiit ph.d.-nngornianut postdocinullu
qinnuteqaqqusinerani kingullermi siunnersuisoqatigiit qinnuteqaatit 19-it katillugit
42,4 millioner kroninik nalillit tiguaat. Ph.d.-nngorniat tallimat qinnuteqaataat
akuerisaapput, katillugillu 12,4 millioner kroninik taperneqarlutik, siunnersuisoqatigiit tusagassiuutinut nalunaarummi ilisimatitsipput.

Ph.d.-nngorniat tallimat ukiuni pingasuni tulliuttuni nammineerlutik ilisimatusarnerminnik itisiliillutik Ilisimatusarfimmi, Pinngortitaleriffimmi aammalu Arctic DTU-mi – Ilinniarfeqarfik Sisimiuni sammisaqassapput.

Suliniutit ilaanni ilaatigut silap pissusaata allanngoriartornera ippernat amerlassusaannut
qanoq sunniuteqarnersoq misissorneqassaaq. Suliniummi allami Sisimiut Kangerlussuullu akornanni
nunap sisoornissaanut aarlerinassusermik naliliissummik ineriartortinneqassaaq.

Ilisimatusarnissamut periarfissiineq

- Ph.d.-nngornianut postdocinullu tapiisarnitsinni ilisimatusartut inuusuttut ilisimatusarnissaannut periarfissaqartittarpavut, taamaalillutik ilisimatusarnerminni ineriartornerannut soqutiginarsaaqataasinnaalluta. Ph.d.-nngorniat aamma ilisimatusarfinni ilisimatusarnikkut piginnaanertusartarput suliartik ilutigalugu piginnaanerat suli alliartuinnarsinnaalluni.

- Kalaallit Nunaata ilisimatusarfiini ilisimatusarnikkut piginnaaninik piginnaasanillu ph.d.-nngorniat aamma nukittorsaaqataapput, annertusiartortitsillutillu, Nunatsinni
Ilisimatusarnermik Siunnersuisoqatigiinni siulittaasoq, Josephine Nymand oqarpoq.

Aningaasalerneqartut tassaapput:

• Line Groth Nielsen suliniutaalu ”En kontekstbaseret og demokratisk dannende
  samfundsfagsdidaktik: Et interventionsprojekt i den grønlandske folkeskole”
  (Inuiaqatigiilerinermi ilinniartitsieriaaseq ataqatigiissaartoq demokratimillu pilersitsisoq: Kalaallit Nunaanni meeqqat atuarfiani akuliulluni suliniut). Suliniut Ilisimatusarfiup ilaani Ilinniartitsinermillu Ilisimatusarfimmi ingerlanneqassaaq.
• Mona Madsen suliniutaalu ”Ældre i eget hjem – ressourcer og lokalsamfund” (Utoqqaat namminneq angerlarsimaffimminniittut – nukissat sumiiffinnilu inuiaqatigiit). Suliniut Ilisimatusarfimmi, Ilisimatusarfiup issittumi atugarissaarneq pillugu ilisimatusarfiani, Isumaginninnermut Immikkoortortaqarfiani aamma Syddansk Universitetip nunatsinni innuttaasut peqqissusiannik ilisimatusarfiani ingelanneqassaaq.
• Rikke Østergaard suliniutaalu ”Whiteness, Power Structure, and Self-Determination in Greenland: Contrasting Views of Sovereignty in the Lens of Critical Race Theory”. Suliniut Ilisimatusarfimmi, Kulturimik, Oqaatsinik oqaluttuarisaanermillu ilisimatusarfimmi ingerlanneqassaaq.
• Steffen Nielsen suliniullu ”Nuna Sisoortoq – Natural Hazards of Mudslides and Permafrost Detachment in Seditary Environments”. Suliniut Arctic DTU – Ilinniarfeqarfik Sisimiuni; Aarhus Universitetimi, HydroGeophysics Groupimi; aamma University of Alaska Fairbanksimi ingerlanneqassaaq.
• Viktor Gårdman suliniullu ”Understanding the Ecological Role of Biting Flies in Greenland”. Suliniut Pinngortitaleriffimmi, Avatangiisinut Aatsitassanullu immikkoortortaqarfimmi aamma Swedish University of Agricultural Sciences, Department of Ecologymi ingerlanneqassaaq.