Illoqarfiit qaammataasatigut attaveqarfiit akikinnerusumik atuinerusinnaalerput

Avannaani Tunumilu illoqarfinni najugaqarfinnilu atuisut naatsorsuutigisinnaavaat internet sukkanerulernissaa akikinnerulernissaalu naatsorsuutigisinnaavaat.

Tusass A/S tusagassiuutinut nalunaaruteqarpoq.

- Tasiilami misileraalluni misissuineq sivisuumik ingerlanneqareersorlu maanna Tusassip illoqarfinni nunaqarfinnilu qaammataasakkut GreenSAT-ikkut attaveqarfiusuni periarfissat nutaat misissoreerlugit neqeroorutit nutaat qaammataasakkut attavilinnut naleqqussakkat saqqummiussinnaanngorpai, pisortaaneq Toke Binzer, tusagassiuutinut nalunaarummi ilisimatitsivoq.

Neqeroorutit marluk ukuupput:

[3/1 Mbit] 299,- /qaamm.

[6/2 Mbit] 599,- /qaamm.

Savaateqarfiit attaviginnerulissapput

Ukiuni kingullerni immap naqqatigut kabelikkut aamma sakkortusaavitsigut attaviit ukkatarineqarput. Kisianni Tusassip maanna GreenSAT-mik isorliunerusuni attaviit sukkatsinneqarnissaat sulissutigaat. Aamma savaateqarfinni ukiuni kingullerni attaveqarniarnikkut ajornartorsiorfiusuni.

- Avanersuarmi Tunumilu atuisut taamaallaat qaammataasakkut attaveqanngillat. Nunatta Kujataani savaateqarfinni qaammataasakkut attaviit aamma atorneqarput. Teknologii atugarput allaanerugaluarpoq, kisiannili qaammataasakkut attavillit tamaasa isiginiarsimavagut, Toke Binzer oqarpoq.

Neqeroorutit nutaat akillu appasinnerusut atuutilersinnerisigut Tusassip neriuutigaa suli amerlanerusut qaammataasakkut attaviit atorlugit internetersinnaalernissaat, periusissiallu timitalersornera piviusunngortitseqataaffigalugu: Nunatsinni innuttaasut kikkut tamarmik attaveqarsinnaalersinnissaat nunarsuullu sinneranut qaninnerulersillugit.

- Tusassimi Nunatsinni sumiiffinni tamani ataavartumik ineriartortitsiuarnissaq pisussaaffigaarput, maannalu qaammataasaqarfinni immikkut ittumik iliuuseqarpugut. Neriuppugut atorluarneqarumaartoq internetersinnaanerullu amerlasuunit atorluarneqarnissaa neriuutigalugu, Tusassimi siulersuisuni siulittaasup Ulrik Blidorfip oqaatigaa.