Ilulissani aalisakkerivik nutaaq pilersinneqarsinnaavoq

Aalisakkerivimmik nutaamik, aalisakkanik soorlu saarullinnik, suluppaakkanik ammassanillu tunisassiornermik pingaarnerutitsisussamik, suliffeqarfik Aalisa ApS sanaartornissamik pilersaaruteqarpoq.

torsk
Ingerlatseqatigiiffiup tunisassiornermik piginnittup ilaatigut saarullinnik tunisisinnaanissaq suliarinnissinnaanissarlu kissaatigaa.

Ilulissani aalisakkerivik nutaaq sanaartorneqalerunarpoq. Ingerlatseqatigiiffik Aalisa Aps, illoqarfiup avannaatungaani qimussit aqqutaata aamma Mittarfimmut Aqqutaata akornanni, aalisakkerivimmik marlunnik quleriilimmik, maskinanut, peqqumaasivinnut biilillu uninngasarfissaannut inissalimmik sanaartorusuttuuvoq. 

Aalisakkanik assigiinngitsorpassuarnik, ingammik saarullinnik, ammassannik, qeeqqanik qalerualinnillu aalisakkerivik tunisassiorfiussaaq.

Aalisakkat taakku Ilulissani ullumikkut tuniniarneqanngitsut Aalisa nassuiaavoq, saniatigooralugu pisarineqartartutut isigineqartarmata, ingerlatseqatigiiffiulli niuerfiusinnaasutut isigai.

Tamanna suliniummut siunnersuummi, Avannaata Kommuniata maanna tusarniaassutigisaani, atuarneqarsinnaavoq.

Nunanut allanut tuniniaanissamik anguniagaqartoq

Ukiup ingerlanerani aalisarnermik, aalisakkanik suliarinninnermik, tuniniaanermik avammullu tunisinermik ukiorpassuarni misilittagaqarluni suliffeqarfik imminut nassuiaassissutigivoq:

- Aalisakkerivimmik piujuartitsisumik pilersitsinissaq anguniagaavoq. Tassani illoqarfimmut iluaqutaasumik, soorlu suliffissaqartitsinermut tunngatillugu aalisakkanillu Ilulissani innuttaasunut tunisaqarsinnaanermut tunngatillugu anguniagaqarluni. 

- Aalisakkat pitsaasut aamma nunanut allanut avammut tunineqartarnerisigut nunatsinni tunisassiat pitsaasut ilisimaneqarnerulissapput, illoqarfiullu aningaasaqarnera nukittorsarneqassalluni, ingerlatseqatigiiffik suliniummut siunnersuummini allappoq.

Aalisakkeriviup nutaap qaqugu naammassineqarsinnaanera suli aalajangersimasumik piffissalerneqanngilaq, tamatumunngalu ilaatigut ingerlatseqatigiiffiup qaqugu nunaminertamik tunineqarnissaa apeqqutaavoq.

Suliniut pillugu tusarniaaneq aggustip 15-iata tungaanut ingerlassaaq.

Powered by Labrador CMS