Ilulissani mittarfissap nutaap pilersaarutai nutaat — aatsaat 26-mi ammarneqassaaq
2026-mi qaammatini pingasuni kingullerni mittarfik aatsaat ammarneqarsinnaassasoq, Greenland Airports ilisimatitsivoq.
Assiliartaliisoq: KAIR
Greenland Airportsip Ilulissani mittarfissualiornissamut pilersaarut nutaaq saqqummiuppaa.
Ilulissani nunanit tamalaanit timmisartoqarfissaq pilersaarutaaqqaartunit kingusinnerusukkut, tassalu 2026-mi qaammatini pingasuni kingullerni, ammartussanngortoq, ingerlatseqatigiiffiup ataatsimeersuarneranut atatillugu tusagassiuutinut nalunaarummi Greenland Airports allappoq.
- Munck Gruppen aamma Greenland Airports, Ilulissani timmisartoqarfissami sanaartornermut piffissamut pilersaarut iluarsisaq pillugu qanittukkut isumaqatigiipput. Sulisussaaleqineq, maskiinat aamma entreprenørimi kingoraartissat, suliassarpassuit saniatigut pilersaarutaasunit annertunerujussuusut paasinarsisimasut, ataqatigiissillugit pissutaasunut ilaapput, ingerlatseqatigiiffik allappoq.
Aallaqqaammut Nuummi mittarfissap nutaap ukiaru ammarneqarneranut atatillugu mittarfik ammarneqartussatut pilersaarutaagaluarpoq.
Sanaartorneq unammillernartoq
2025-mi ammarnissaa neriuutigineqarsimasoq, sanaartornerli unammillernartunik nalaataqarfiusimasoq, pisortaq Jens Lauridsen oqarpoq:
- Kalaallit Nunaanni innuttaasut suliffeqarfiillu arlallit timmisartoqarfiup ammarnissaanut qilanaartut aammalu neriulluarnerat annertoorujussuusoq ilisimavarput. Ilumoorlungalu oqassaanga, kingusinnerpaamik 2025-mi Ilulissani timmisartoqarfiup ammarnissaa angumerineqarsinnaassasoq neriuutigisimagaluarlugu.
- Kisianni peqatigisaanik unammilligassat, Munck Gruppen-ip sanaartugassamik suliaqarnermini nalaassimasai akueraakka – aammalu sanaartugassamik inaarsaanissamut piffissamut pilersaarutip iluarsisap piviusorsiortup isumaqatigiissutiginissaa iluatsimmat nuannaarutigaara, Jens Lauridsen oqarpoq.
