Ilulissani takornarialerisoq: Suleqatigiissaagut
Ilulissani mittarfissuaqalerpat ukiuni tulliuttuni malunnartumik takornariaqarnerulernissaa naatsorsuutigineqarpoq. Takornarialerisut tamarmik immikkut neqerooruteqarsinnaagamik qanimut suleqataanissartik piareersimaffigaat.
Ilulissani mittarfissuassap atuutilernissaa kinguaattooqqavoq, 2025-mili atuutilernissaa KAIR-imit kingullermik nalunaarutigineqarpoq.
Assiliartaq: KAIR
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
Ilulissani
mittarfissuassaq pilersaarutit malillugit 2025-mi atuutilissaaq, atuutilerpallu
takornariaqarneq malunnartumik annerulissasoq naatsorsuutigineqarpoq.
Ilulissani takornariartitsisartut nutaat arlallit ukiuni kingullerni
pilersinneqarput. Restaurant & Bar Naleqqamik ingerlatsisoq taakkununnga
aamma ilaalluni Naleraq Sea Safarisimik pilersitsivoq.
- Anaanama
Restaurant & Bar Naleraq Ilulissani aallartippaa, kinguaariillu 2014-imi
nikipput. 2019-imi Targasivugut, takornarianillu angallassilaartalerluta.
Politiit angallataat Sisak, MS Heidimik ullumi taaguuteqartoq pisiarigatsigu
2022-mi angallassinerusalerpugut, restaurant & bar Naleqqamik Naleraq Sea
Safarisimillu uini kystskipperitut ilinniarsimasoq Preben Jensen peqatigalugu
ingerlatsisoq Heidi Jensen oqaluttuarpoq.
Kalaallit
Nunaat pillugu Folketingimi ataatsimiititaliamut ilaasortat Pituffimmut,
Qaanaamut Siorapalummullu 2023-mi tikeraaramik MS Heidimut ilaapput. Tamatuma
saniatigut MS Heidi inuussutissarsiortunik assigiinngitsunik, Naalakkersuisunut
ilaasortanik takornarianillu angallassisareerpoq.
-
Angalarusuttoqartartupilussuuvoq. Akunnittarfiillu inissaalatsitsisinnaapput,
taamaattoqassappallu umiarsuarmi unnuisitsisinnaanerput iluaqutaassaaq.
Illoqarfimmik
pilersaarusiornermi unammillernartoqartoq
Ukiut tulliuttut ulapiffiunissaat Heidi Jensenip ilimagaa, ulapiffiussappatalu
illoqarfimmut arlalitsigut unammillernartoqassaaq.
- Ilulissani
namminersortunik takornarialerisorpassuaqarpoq, tamattalu assigiinngitsunik
neqeroorutissaqartarluta. Takornarialerisut allat ikioqatigiutigalugit
assigiinngitsunik sullissinissamik neqerooruteqarsinnaanissamut
periarfissaqarsoraara. Tamatta tamaanimiunik sulisinnaasunik
Ilulissiartitsisussaavugut, erngullu nukinganik seqerngullu nukinganik
nukissiornermik pitsaasuusunik atorluaanissamik qulakkeerinnittussaalluta,
taamaasillutalu takornarianut iluamik takutitsissalluta,
Heidi
Jensenip oqarnera naapertorlugu, Ilulissat allilernissaannut
ajornakusoortitsisunik illoqarfimmik maanna pilersaarutaasumi unammilligassaqarpoq.
- Illoqarfik
Unesco-qarfimmit, imeqarfiup killinganit mittarfimmiillu mattusimaqqalaarami
allisikkuminaappoq. Takornariartullu amerlippata, allisitsinissaq siunissami
pisariaqassaaq. Inuussutissarsiortut suliniuteqalersinnaanissaat oqartussanit
taamaalilluni akornusersorneqarpoq, tassanilu inatsisit piuminaalaarsoraakka.
Akunnittarfiit, neriniartarfiit assigisaallu pingaaruteqartutuaanngillat, aamma
takornarialerinermik suliaqartut inissaannik sanaartornissaq pingaaruteqarpoq.
Takornarianik
nassuiaassisartut avannaamiut
Tamatuma
saniatigut, Campus Kujallermi Qaqortumiittumi ilinniakkanut Artic Guidemut
Adventure Guidemullu assingusunik Avannaani ilinniarfeqalernissaa Heidi
Jensenip aamma kissaatigaa. Taamaattumimmi pilersitsisoqassappat, Avannaanit
inuusuttut takornarianik peroriartorfigisaminni
nassuiaassisartunngorsinnaassapput.
-
Ilulissanut takornariartunik nassuiaassisartut tamaanimiuunissaat
pingaaruteqartupilussuuvoq. Taakku nassuiaassisartuugaangamik illoqarfimmut
Ilulissat Kangianullu oqaluttuatik namminneq misigisimasaminnik oqaluttuanik
alutornarsarsinnaasarmassuk, takornarianut misigisaq allaanerusarpoq
piviusuunerusarlunilu, Heidi Jensen oqaluttuarpoq.
