Ukiut
marluk qaangiuppata Ilulissani mittarfik nutaaq atulerpat
takornariarpassuaqalernissaa naatsorsuutigineqarpoq, taamaattumik Avannaata
Kommunia Ilulissanilu takornarialerisut piareersarlutik aallartissimalerput.
Ilulissat Excursions naapertorlugu ukioq manna siorna piffissamut tassunga
sanilliullugu takornariat amerlanerupput – tamannalu takornarialerisunut
ulapaarnerulersitsivoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Ukiut
marluk qaangiuppata Ilulissani mittarfik nutaaq atulerpat
takornariarpassuaqalernissaa naatsorsuutigineqarpoq, taamaattumik Avannaata
Kommunia Ilulissanilu takornarialerisut piareersarlutik aallartissimalerput.
Ilulissat Excursions naapertorlugu ukioq manna siorna piffissamut tassunga
sanilliullugu takornariat amerlanerupput – tamannalu takornarialerisunut
ulapaarnerulersitsivoq.
Ineriartornermut
iluaqutaassasoq
Avannaata
Kommunia illoqarfimmilu takornariartitsisartut mittarfiup 2026-mi atulernissaa
naatsorsuutigineqartoq sioqqullugu piareersaatitut suliniutinik arlalissuarnik
aallartitsipput, tassungalu atatillugu ilaatigut Avannaata Kommuniani
kommunalbestyrelsi Ilulissani takornariartitsisartunut pikkorissaavimmik pilersitsinissamut
aningaasaliissuteqarnikuuvoq. Ilulissani Majoriami init
pikkorissartitsiviusinnaasut taamaattumillu aallaqqaammut pikkorissaavimmik nutaamik
sananissaq pisariaqanngitsoq kommunalbestyrelsi naliliivoq. Siunissamili
pikkorissartitsivimmik nutaamik sananissaq pisariaqalissappat illutaassaata
sanaartorneqarnissaa periarfissaasoq kommunalbestyrelsi aamma naliliivoq.
Pikkorissaavittaassaq
takornariartitsinermik inuussutissarsiutip annertuumik siuarsaavigineqarneranut
iluaqutaanissaa Avannaata Kommuniani takornariaqarnermut siunnersortip Asbjørn
Dissing Bargsteenip neriuutigaa. Aammalu Ilulissani mittarfissaq takornariaqarnerup
siuariarneranut kinguneqaannarani, tamanna takornariartitsisartunut
amerlanerpaanut iluaqutaassasoq, taanna isumaqarpoq.
- Suliffeqarfiit
takornariartitsinermik suliaqartut tamarmik nunaqavissunik atuerusuttarput. Kisiannili
pikkorissarsimanermut uppernarsaatit amigaataasarmata sulisussarsiorneq
ilaannikkut ajornakusoortarpoq.
- Assersuutigalugu
umiatsianik ingerlatsisut umiatsiamik aquttup inunnik aqqaneq-marlunnik
angallassinissamut pikkorissarsimasup piginnaaneqarnissaa pisariaqartittarpaat,
ikittuinnaalli pikkorissarsimanermut uppernarsaammik peqartarput
pikkorissarnerit akisuvallaarnerat pissutigalugu.
- Taamaattumik
pikkorissaavik nutaaq atulerpat illoqarfimmiut amerlanerpaat takornariaqarnerup
iluani pikkorissarsinnaalissapput, tamannalu takornariaqarnermut
iluaqutaassaaq, takornarialerinermut siunnersorti oqarpoq.
Akunnittarfinnik
ingerlatsineq, takornarianik angallassineq, imaatigut angallassisinnaanermut
pikkorissarneq, nunami allamiut oqaasiineq atuisinnaaneq, nittarsaassineq piorsarsimassuserlu
pillugu saqqummiinerit pikkorissaassutigineqartartussat ilagaat.
Ingerlalluartut
Asbjørn
Dissing Bargsteen naapertorlugu Ilulissani takornariartitsisarneq ukiuni
kingullerni soqutigineqaleraluttuinnarpoq.
- Takornariartitsisartut
amerliartupiloorsimapput, ullumikkullu illoqarfimmi takornariartitsiniartut
30-t missaanniipput.
- Illoqarfimmut
takornariarpassuit tikittarnerat tamatumunnga pissutaasut ilagaat,
illoqarfimmilu takornariartitsisartut amerlasuut najugartik pillugu, tamaanilu
isumannaatsumik qanoq angalasoqarsinnaanera pillugu ilisimasaqarluarput.
Aammali
takornarialerisut suliffeqarfiutiminnik annertuumik inerisaasut
ingerlalluartullu amerliartortut, taassuma oqaatigaa.
- Namminersorluni
suliffimmik aallartitsiniarneq ajornakusoorsinnaavoq, maanili
takornariartitsinerup ineriartornera ingerlalluarpasippoq.
- Nunanit
allanit angalatitsiviit takornariartitsisartut, nunaqavissunik
assigiinngitsorpassuarnik takornarissanut neqerooruteqarsinnaasunik, ilaatigut
unnuisarfiutilinnik, atorluaanerorusupput.
- Suliniutillu
pitsaasut ilagaat Ilulissani takornariartitsisartunit qulingiluaasunit
pigineqartup Ilulissat Excursion ApS-ip pilersinneqarnera, taannalu angusaavoq
annertooq.
Siorna
takornariat 20.000-it missaanniittut umiarsuarnillu takornariartaatinik
takornariat taama amerlatigisut missaanniittut Ilulissanut tikipput.
Takornarissat
amerliartortut
Ilulissat
Excursionsip pisortaa Jan Cortsen naapertorlugu ukioq manna Kalaallit Nunaanni
illoqarfiit takornariaqarfiit annersaanni siorna piffissamut tassunga
sanilliullugu takornarissat tikittut amerlanerupput – tamannalu
takornariartitsisartunut ulapaarnerulersitsivoq.
- Ilulissat
Excursionsip pilersinneqarnera Ilulissani takornariartitsisartunut tamanut
pitsaasumik suliniutaavoq.
- Suliffeqarfiit
Ilulissat Excursionsimut piginneqataasut qulingiluaasut ilaat aasaq manna
tamarmik ulikkaarlugit inniminniiffigineqarnikuupput. Taamaattumik Ilulissat
Excursionsip pilersinneqarnera piginnittunut iluaqutaaginnarani aammali
illoqarfimmut iluaqutaavoq.
- Mittarfik
nutaaq atulerpat takornariaqarnerulernissaq ilimanarluinnarpoq, ukiullu
ingerlanerani takornariaqarnermik ineriartortitsiumalluta nunaqavissut
ataatsimoornerusariaqarpugut, taanna oqarpoq.
Ilulissat
Excursions aamma Hotel Ilulissat suleqatigiinnissamik isumaqatigiissuteqarput. Suliffeqarfik akunnittarfimmi allaffeqarpoq
maannakkumullu marlunnik sulisoqarluni.
