Ilulissani taxat annertuumik ajornartorsiutaasut
Ilulissani mittarfissuup atuutilernissaa sioqqullugu taxat ilaasunik sullissinerat pitsanngorsaavigineqartariaqartoq, taxaatillit, taxartartut aamma Avannaata Kommunia isumaqarput.
Ilulissani mittarfissuup atulernissaa sioqqullugu taxaateqarneq pitsanngorsaaviginiarlugu taxanut akuersissutit 35-niit 50-inngortinneqarnissaat Avaannaata Kommuniani kommunalbestyrelsip martsimi aalajangerpaa, tamannalu akerleralugu Ilulissani taxaatillit taxartartullu majimi akerliussutsimik takutitsipput.
Taamak allaaserisaqarpoq aviisi Sermitsiaq.
Ullorli manna tikillugu Avaannaata Kommunia pitsanngorsaataasinnaasunik saqqummiussaqarsimanngitsoq, tamannalu kommunip suleqatiginnikkusussuseqannginneranik ersersitsisoq, Ilulissani Taxaatillit Peqatigiiffianni siulittaasoq, Sálérak Johansen, aqqanilinnik taxaateqartoq 20-llu missaannik sulisoqartoq oqarpoq.
Ilulissanilu taxaateqarneq aaqqissuussaanngitsumik ingerlanneqartoq, aaqqiissuteqartoqarnissaalu qulakkeerniarlugu taxaatillit, taxartartut kommunilu qanimut suleqatigiittariaqartut, Ilulissat Taxartartut Peqatigiiffiat isumaqarpoq.
Aaqqiissutissanillu ujartuinissaq qulakkeerniarlugu illuatungeriit tamarmik naapisinneqarnissaat kissaatigineqartoq, kommunalbestyrelsimi Inuussutissarsiornermut Ataatsimiititaliaq paasissutissiivoq.
Suleqatigiinneq pitsaanerusariaqartoq
Ilulissani taxat 35-iusut naammattut taxartitsisunilli amigaateqarneq pissutaalluni piffissap ilaani taxat ikittuinnaat ingerlaartartut, tamannalu atuisinik sullissinermut annertuumik eqquinerluttartoq, Ilulissani Taxartartut Peqatigiiffianni qulit missaannik ilaasortaqartumi siulittaasup tullia, Ole Ostermann, oqarpoq.
Taxanermi akigititap aallarniutaasup maannakkut 22 koruuniusup 30 koruunimut qaffanneqartuuppat taxartartutut sulineq kajungernarnerulersinnaasoq, taxartartut peqatigiiffiat isumaqarpoq.
Allaaserisaq tamaat aviisi Sermitsiami atuaruk:
