Ilulissat eqqaanni takornarianut illuaqqat nutaat sananeqassasut

World of Greenland, Namminersorlutik Oqartussanit pigineqartoq, Ataani takornarianut illuaraqarfinnik sanaartorusuppoq, suliniutissatut siunnersuummi tamanut tusarniutigineqaleruttortumi oqaatigineqarpoq.

Avannaata Kommunia nittartakkamini taama ilisimatitsivoq.

Akiliilluarlutik takornariarumasunut (High end) 40-it tikillugit illuaqqani 20-ni immikkut perusuersartarfilersukkani inissaqarfiusussat, tassani atuarneqarsinnaavoq. Saniatigut aamma pilersinneqassapput kinisimaartarfiit, nerisarfik, saaffiginnittarfik, illuaqqallu ataatsimoorussamik aneerasaartarfilersugaassapput ikaartarfilianik imminnut ataqatigiissunngortitaasimasut, kiisalu peqqumaasivik, sulisunut inissiaqarfik sissamilu puttasoq taliffigineqarsinnaasoq.

Suliniummut nassuiaat naapertorlugu, Ataa Lodge Ilulissani illoqarfippiaani takornariat artukkiinerannik oqilisaaqataassaaq, aammalu Ilulissat eqqaanni sumiiffimmi suliarisassanik neqeroorutit annertunerit pilersissavai.

SUP aamma qajartuarnerit

Suliarisat annertunerit sumiiffiusumi namminersortutut suliaqartuusunit angalaartitsinermik unnuisitsinermillu neqeroorutaasut iluini sunniuteqaqataaffinnik ilalersuissasut, World of Greeenland isumaqarpoq.

- Ataani suliarisat tassaassapput pisuttuarluni takornariarnerit, kangerlummi Kangiani angalaarnerit, qajartuarnerit aamma SUP-imik suliarisat. Ilulissat, Ataa-ta aamma Eqip akornanni tikeraat nooqattaartinnissaannik Ataa Lodge periarfissiissaaq, WOG allappoq.

Tamanna sumiiffimmi unnuisarnernik amerlanernik tunisissaaq, aammalu amerlasoorsuakkaanik takornariaqarnerit pilersinnagit misigisaqarnissamik neqeroorutit amerlanerit sumiiffimmi ataasiinnarmiilersissavai, taama naliliisoqarpoq.

Suliniummi Eqi Glacierimi suliat suleqatigiissutigineqassapput, 'Eqi Lodge' ilanngullugu, tassani aamma taanna piginnittuuvoq.

Suliniummut nassuiaat tamarmiusoq UANI atuarsinnaavat.