Ilungersunarpoq piareersimavugulli
Jens B. Frederiksenip marlunngornermi attaveqaqatigiinnermik ataatsimeersuarneq Aalborgimi ammarpaa, niuertut aningaasaliisartullu 100 sinnillit peqataaffigisaat

- Hvad skal vi leve af i fremtiden? For det ser ikke så pokkers godt ud med økonomien, når vi sammenligner os med de andre lande,
- Siunissami suna inuussutigissavarput? Ilami aningaasaqarnerput pitsaavallaanngilaq nunanut allanut sanilliutissagutta.
Taama aperaaq ineqarnermut, attaveqarnermut angallannermullu naalakkersuisoq Jens B. Frederiksen marlunngornermi attaveqaqatigiinneq pillugu ataatsimeersuarneq Arctic Business Network ammaanersiorlugu oqalugiarnermini. Attaveqaqatigiiffik Kalaallit Nunaanni Danmarkimilu suliffeqarfinnik ataqatigiissitsisussaq.
- Kisianni nikeriarfiup nalaanniippugut. Ilami alloriarneq siunissamut aqqusaaliivipparput, unammisassalli makkua Jens B. Frederiksenimit taaneqarput:
- Kalaallit Nunaata aningaasatigut isertitaasa affaat raajaneersuupput - ukioq manna raajartassat sisamararterummik ikilipput.
- Kalaallit Nunaata aningaasatigut isertitaasa 7 procentiinnaat aatsitassaneersuupput.
- Peqqinnissaqarfimmi aningaasartuutigut qaffakkiartorput.
- Ukiut arfineq-marluinnaat ingerlaneranni innuttaasut 7000 nunanut allanut nuupput.
- Suliffissaaleqisut amerliartorput namminersortut pisortallu akiitsui qaffasipput taamaattumik Kalaallit Nunaanni maanna qanoq iliuuseqartoqartariaqarpoq Grækenlandimisulli pisoqassanngippat Jens B. Frederiksen oqarpoq, illuatungaanili ajornerpaamik isiginnissinnaanngitsoq: - Aallartiinnartariaqarpugut, oqarpoq aatsitassarsiorneq pillugu.
- Isuani aatsitassarsiornissaq eqqaaginnarutsigu, aatsitassarsiorfimmik pilersitsiniarnissami inuit 2100 atorfissaqartinneqarput Alcoa 2600 sulisunik pisariaqartitsissaq. Tamatuma kingorna ingerlatsinermi suliffissat 700 Isuani taavalu 650'it Alcoamit pigineqalissapput. Kisitsisit Kalaallit Nunaat eqqarsaatigalugu qaffasikulupput, soorunami qanoq iliornissamik pisariaqartitsisut, Jens B. Frederiksen oqarpoq.
- Suliassaq piareersimaffigaarput, Jens B. Frederiksen ataatsimeersuarneq aallarnerlugu oqarpoq. Ataatsimeersuarneq ulluni marlunni ingerlasoq ilaatigut Jørgen T. Hammeken-Holmimit, aatsitassarsiorniarlutik qinnuteqartarfimmi atorfilik aamma Peter Friesleben, Arctic Import kiisalu Hans Kristian Olsen, Nunaoil saqqummiipput.
Pingasunngornermi Aalborg Havn takornariarfigineqarpoq.