Imermik avammut nioqquteqarneq: Sumiiffiit januaarimi suliariumannittussarsiuunneqassapput
Avammut niuerneq aallartisarneqarnerussaaq. Aqqalu Jerimiassen paragraf 37 atorlugu apeqquteqaammut taama akissuteqarpoq.
Imeq sermerlu annertoorujussuupput – taakkunanngali niuerneq annertungisassanngilaq.
Ukiuni kingullerni arlalinni avammut niuernerup annertusarneqarnissaanut sulissuteqartoqaraluartoq, taamaattoq avammut niuerneq suli annertunerulersimanngilaq. Maannali qanoq iliortoqassaaq, inuussutissarsiornermu naalakkersuisoq, Aqqalu Jerimiassen (A) taama allappoq.
- Naalakkersuisut GEUS (Danmarkimi Kalaallit Nunaannilu nuna tamakkerlugu nunalerisut) peqatigalugu sumiiffiit maqiteriffiusinnaasut sumilu annertunerunersut inissiisoqarsimavoq. GEUS-ip misissuineri tamanut suliariumannittussarsiortoqarneri ilutigalugit saqqummiunneqartassapput, taamaasiornikkut soqutiginnittut paasissutissat tamakkerlugit pissarsiarisinnaassavaat, Aqqalu Jerimiassen (A) allappoq.
Suleriuseq killormut saanneqarpoq
Paasissutissat Randi Vestergaard Evaldsenip (D), paragraf 37 atorlugu, sooq nunanit allamiut nunatsinni imermik nioqquteqarnissamut aningaasaleerusunngitsut pillugu apeqquteqaataani, atuarneqarsinnaapput.
Aqqalu Jerimiassen nassuiaavoq sermimik imermillu avammut tunisassiortoqarnissaanut periusissiortoqarneranut atatillugu suliffeqarfinnut sinaakkutissat qanoq pitsanngorsarneqarsinnaanerat misissorneqarsimasoq. Suliffeqarfiillu namminneq erngup sumiinneranik ujaasisariaqartarnerat akornutit ilagisimagaat paasineqarpoq. Suleriuseq maanna killormut saatinneqarpoq, taamaasillutik sumiiffiit suliariumannittussarsiuunneqartalissallutik.
Januaarip qiteqqunnerani suliariumannittussarsiuussisoqalissaaq.
Royalty appasinnerusoq RAL-ilu atorneqarunnaarluni
Qinnuteqartunuttaaq pissutsit marluk allat pitsanngorsarneqarsimapput. Misissuinermimi paasinarsivoq Kalaallit Nunaanni akitsuut nunanut allanut sanilliullugu qaffasinnerusoq. Taamaammat royalty-mut akitsuut liiterimut 0,10 øremiit liiterimut 0,04 øremut apparneqarpoq.
Sinaakkutit suli pitsaanerutinniarlugit aamma allannguisoqarpoq. Imermik assartuinermi RAL-imik atuinissamut piumasaqaat peerneqarpoq. Qinnuteqarnissamullu periuseq ajornannginnerulersinneqarlutik.