Immakkut angalanermi suut tamarmik ikaneralaannguamiittarput: Qanga pissutsit uterfigalugit
AG nunaqarfiusimasuni Nordafarimi Kangerluarsorutsimilu (Færingehavn), Savalimmiormiut aalisartut najugaqarfigisimasaanni, takornariarpoq. Angalanermi arfernik qilannganillu aamma takuniaasoqarpoq. Angalaneq nuannerluinnartoq puigunaatsorlu.
Angerlarsimaffimma saavani imaq qatsungalluinnarpoq. Tamatuma akerlianik Nuup saavani imaq aalaneruvoq, anori nillataarluni seqinerlu nuissanit assersimaneqarluni. Targamili mallit mikisut soqutaanngillat. Sinnassarlutalusooq aalataartinneruaatigut. Ok, ok, immaqa uangaanerusoq, sinngusarama. Sapaammimi illernartumi ullup-qeqqata siornatigut aatsaat nalunaaqutaq qulinngorpoq.
Angalanissaq inniminnerakku Anaanat Ulluanni pissasoq paasinngitsoorsimavara. Aatsaat nukarliliarma arfininngornikkut uannut tunissutissaminut aningaasaatini tamaasa atormagit paasilerpara ullormi sorlermi aallassanerlunga, taamaalilluni Anaanat Ulluani nuannersumik imaatigut angalaffiuvoq.
Aviisi AG taama allappoq.
Ilaasut ilaat alla tassaavoq 55-inik ukiulik Jan Heegård Petersen, Ilisimatusarfimmi avataanit ilinniartitsisuujartortoq, aatsaavissuarlu Nuummiittoq.
- Kikkunnit tamanit inanneqarsimavunga Nuup avataani asimut angalaaqqullunga, taamaattumik periarfissaq manna atorluarpara, oqarpoq, nangillunilu, arfernik takunissani neriuutigigini.
- Iluatsitsillunga arfernik takussagaluarama tamanna oqaluttuarisinnaarusuppara.
Jan Heegaard Petersenip maanga tikinngikkallarami Færingehavn imaluunniit Nordafar tusarsimanngilai, kisianni aallannginnermi sumiiffik google aqqutigalugu paasiniarsimavaa.
Angalaneq naajartulerpat Jan uterfigiumaarparput.
Targami Greenland Cruisesimit pigineqartumi Malami ullormut angallatip naalagaa tassaavoq 32-nik ukiulik Georg Jonathansen, 2018-imiilli aasat tamaasa suliffeqarfimmi sulisarsimasoq. Taanna 2016-imi misigisassarsiortitsinermi angallassisartutut, adventureguidetut, ilinniagaqarsimavoq.
- Tunuatungaani kaffeqarluni teeqarpoq. Nammineerluni tigusisoqarsinnaavoq, ilaasunut oqarpoq.
Ilulissani Nuummi angalaarnerup assigiinngissutaat tassaapput oqaatsit ilulissallu. Nuummi iluliaqanngilaq, ilaasullu qallunaatut oqaluttuunerusarput, Ilulissanili ilaasunik tuluttuunerusoq oqaloqateqartarluni.
Aviisimi AG-mi atuarnerusinnaavutit. Aviisi uani pissarsiariuk:
