Immap naqqatigut kabeli nutaaq akisunerujussuussaaq
Tusass A/S immap naqqatigut nutaamik kabeliliornissamik 2021-mi aalajangerneraniilli, immap naqqatigut kabelit akii qaffarujussuarsimapput.
Imaatigut kabelip nutaap 1.760 kilometerisut takitigisup atortuisa akisunerunissaat pilersitsinermut atatillugu navianartorsiortitsisinnaavoq, pilersitsinerlu milliuuninik pingasunik kisitsisitalinnik akeqassasoq naatsorsuutigineqarpoq, pisortaaneq Kristian Reinert Davidsen Sermitsiaq.AG-mut oqarpoq.
- Ukiualuit matuma siorna suliniut aallartikkatsiguli maannakkumut akit marloriaammik qaffariarsimapput. Uulia akitsoraluttuinnarpoq, atortussat soorlu sisak akitsoraluttuinnarput erniallu ukiualuit matuma siornarnit qaffasinnerujussuanngorlutik, tamannalu immap naqqatigut kabelinik ikkussuinerup aatsaat taama akisutiginissaanut nassuiaataapput, Kristian Reinert Davidsen oqarpoq.
Ilulissani iluatsitsisut
Aningaasatigut navianaatit pinngitsoortinniarlugit suliniut immikkoortunut arlalinnut avinneqarpoq. Immikkoortoq siulleq naammassigaluttuarpoq, tassa Qaqortumiit Ilulissat tungaannut immap naqqanik misissuineq.
- Qeqertarsuup Tunuani Ilulissat eqqaani immap naqqani qooqqinermik nassaarpugut, tamatumalu qulakkiissavaa immap naqqatigut kabelimik nutaamik talliliisoqassappat, iluliarsuit immap naqqani kabelimut ulorianartorsiortitsinnginnissaat, Tusassimi pisortaq oqarpoq.
Sisamanik alloriarnilik
- Kalaallit Nunaat EU-mut ilaasortaanngikkaluartoq Issittumi attaveqaatit pingaarutillit EU-p suliniutigisartagaasa pingaarnersaattut isigimmagit pitsaasuuvoq, Kristian Reinert Davidsen oqarpoq.
Suliniummi annertuumi, Kalaallit Nunaata internetimut attaveqartuaannarsinnaanissaanut iluaqutaasussami, alloriarnerit sisamanut avinneqarsimapput:
- Immap naqqanik misissuineq (naammassiartuaarneqartoq)
- Nunami tigooraaviit pilersinneqassapput
- Immap naqqatigut kabelit sanaartorneqassapput
- Kabelit immap naqqani ikkussuunneqassapput
- Aningaasatigut taperneqarnissamut periarfissat allat misissuleruttorpavut kabelillu sananeqarnissaanut neqeroorut suliarileruttorlugu, pisortaq oqarpoq.