Immikkut ilisimasalik: Isumalluarnarpoq
Kalaallit Nunaata kitaani uuliamik nassaartoqarnerata ilimanersitippaa piiarneqarsinnaasup annertuujunissaa, DTU-mi pisortaq oqarpoq.
Taama oqarpoq DTU-mi Institut for Kemimi pisortaq Erling Halfdan Stenby, ullaaq manna Skotlandimiut uliasioqatigiiffiat Cairn Energy nalunaareersorlu Kalaallit Nunaata kitaani qillerivimmi Alpha-1S1-imi uulianik assigiinngitsunik marlunnik nassaartoqartoq.
Taama allappoq politiken.dk.
Uulia ujaqqani sioqqanilu innermik anitsinikkut pinngorsimasuni nassaarineqarpoq, tassanilu qillernineq 4.358 meterinik ilorpasitsigisumiippoq, sulilu ilorpasinnerusumut qillerisoqarpoq.
Erling Halfdan Stenbyp ingammik maluginiarpaa, uuliat assigiinngitsut marluk nassaarineqarnerat qillerivimmilu isorartumi nassaarineqarlutik.
- Taassuma takutippaa uuliaqarfiit qaqqat sananeqaataat assigiinngitsut marluusut. Niuernikkut iluaqutigineqarsinnaasumik annertussuseqarnersut nalilerneqartariaqassaaq, tamannali aatsaat pisinnaavoq misiligutaasumik tunisassiornikkut, takuneqarsinnaassaarmi uuliaqarfiit qanoq annertutigisumik naqitsineqarnersut, oqarpoq nassaarnerlu isumalluarnartoqartillugu.
- Nutaarsiassaavoq nuannersoq naqissuserneqarpormi tassani uuliaqartoq annikitsuinnaanngitsumillu, Politikenimut oqarpoq.