Sinerissami imaatigut ilaasunik angallassisinnaaneq attatiinnarneqassasoq, Inatsisartuni ilaasortat isumaqarput, taakku sinersortaatip Sarfaq Ittuup 2025-p kingorna qanoq ingerlanneqarnissaa pillugu nassuiaammik tunineqarsimapput.
– Arctic Umiaq Linep matunissaa siunertaanngilaq, immakkulli ilaasunik angallassinerup qulakkeernissaa siunertaavoq, Aqqalu Clasen Jeremiassen (A) oqarpoq.
Sinerissami imaatigut ilaasunik angallassisinnaaneq attatiinnarneqassasoq, Inatsisartuni ilaasortat isumaqarput, taakku sinersortaatip Sarfaq Ittuup 2025-p kingorna qanoq ingerlanneqarnissaa pillugu nassuiaammik tunineqarsimapput.
– Arctic Umiaq Linep matunissaa siunertaanngilaq, immakkulli ilaasunik angallassinerup qulakkeernissaa siunertaavoq, Aqqalu Clasen Jeremiassen (A) oqarpoq.
Anders Olsen (S), umiarsuarmik nutaamik, nutaaliaasumik, sukkanerusumik, amerlanerusunik ilaasoqarsinnaasumik sinerissamilu sumiiffinnut arlalinnut tikissinnaasumik, siusinnerusukkut siunnersuuteqartoq, sinersortaatinik ilaasunik angallassisoqarsinnaanera attatiinnarniarlugu ilungersortoqartariaqartoq isumaqarpoq.
- Umiarsuarmulli nutaamut aningaasaliitinnata Nuummi Ilulissanilu mittarfiit nutaat qanoq ingerlanersut ilaasullu angalasarnerat qanoq ikkumaarnersoq takoqqaartariaqarparput, oqarpoq.
Inuit Ataqatigiit ilaasunik umiarsuakkut angallassisarneq pisariaqartoq isumaqarput.
- Sinerissami ilaasunik angallassineq unammillernartorujussuuvoq, taamaattumik sinerissami ilaasunik angallassinissamut soorunami periarfissaqartariaqarpugut. Tamanna inoqarfinnut mikinerusunut, soorlu Kangaatsiamut, Attumut Qasigiannguanullu, umiarsuaq maanna tikittartoq innuttaasunut angallassinissamut periarfissaqalerneranut pingaaruteqartorujussuuvoq, Kristian Jeremiassen (IA) oqarpoq, taassumali Arctic Umiaq Linep nutarternissaanut ineriartortinnissaanullu 450 millionit koruuninik aningaasaliinissaq nangaassuteqarfigaa.
– Umiarsuaatileqatigiiffik takornarianut tuniniaallaqqinnerusariaqarpoq, kiffartuussinissamut isumaqatigiissutit aningaasaliinerillu aqqutigalugit pisortanit tapiissuteqartarnermut pinngitsuuisinnaajunnaartariaqarput, allatut eqqarsartariaqalerput, oqarpoq.
Demokraatit oqaaseqartinniarneqaraluarput, kisianni piffissaq killiliussaq sioqqullugu oqaaseqartinneqarsinnaasimanngillat.
Innuttaasut pisariaqartitaannut naleqqussarneq
Naleqqap siulittaasuata nalunaarusiaq isornartorsiorpaa piumasaralugulu ataqatigiissumik angallannermik ingerlatsineq pillugu nalunaarusiortoqassasoq.
- Nassuiaammi sammineqartariaqarpoq Kalaallit Nunaanni angallannerup qanoq pitsaanerusumik ataqatigiissaarneqarsinnaanera, assersuutigalugu Air Greenlandip namminersortullu ingerlatseqatigiiffiisa soorlu Disko Linep, unammilleraluarlutik pilersaarutitik ataqatigiissaartariaqarpaat arlaatigut ataatsimoorfeqartariaqarmata, Pele Broberg oqarpoq.
Taanna isumaqarpoq imaatigut silaannakkullu angallassisoqartariaqartoq.
- Aningaasaqarneq eqqarsaatigineqassanngilaq, innuttaasunulli qanoq oqilisaasinnaanerput eqqarsaatigineqassaaq, mittarfiimmi nutaat sananeqaraluartut ilaasunik imaatigut angallassisoqartuassammat, Pele Broberg oqarpoq.
Aqqalu Clasen Jeremiassen (A) isumaqarpoq, ingerlatseqatigiiffiit kiffartuussinissamut isumaqatigiissuteqartut ilaasunik angallassinissamut suleqatigiilluarsinnaanerusariaqartut, pilersaarutiminnillu ataqatigiissaarilluarnerusariaqarlutik.
- Suliffeqarfiit kiffartuussinissamik isumaqatigiissuteqartut suleqatigiinnissaannik piumasaqarfigineqarnissaat politikikkut aalajangerneqartariaqarpoq, oqarpoq.
Arctic Umiaq Line pillugu assigiinngitsunik isumaqartoqartoq
Arctic Umiaq Linemi pisortanngorlaaq, Taitsiannguaq Olsen oqarpoq, Sarfaq Ittuup Nanortalimmiit Uummannamut sinerissami angallassiffia nutaaq aqqusaartuiffiusartoq iluatsinngitsoorsimasoq, Arctic Umiaq Linemimi kisitsisatigineqartut takutippaat, siornamut sanilliullugu ilaasut affaannanngorsimasut. Politikerit aamma taama isumaqarput.
- Arctic Umiaq Line takornarianut inissaqartitsiniarnermigut ineriartortitsilluarnerusariaqaraluarpoq kiffartuussinissamut isumaqatigiissut aqqutigalugu tapiissutinik pinngitsoorsinnaanini qimallugu, Kristian Jeremiassen (IA) oqarpoq.
Aqqalu Clasen Jerimiassen (A) isumaqataavoq isumaqarlunilu Arctic Umiaq Line Royal Arctic Linep ataaniilertariaqartoq.
- Angallavinnik nutaanik aaqqissuussineq iluatsinngitsoorpoq, oqarpoq.
