Inatsisissatut siunnersuummit ernianik ilanngaateqartarneq atorunnaarsinniarneqarpoq – aningaaserivik qularutiginnippoq
Naalakkersuisut inatsisissatut siunnersuut aqqutigalugu ernianik ilanngaateqartarnerup atorunnaarsikkiartuaarnissaa kissaatigaat taarsiullugulu initaarnissamut aningaasalersuinermut ernianut tapiissutinik atuutilersitsiumallutik. Grønlandsbanken allannguutit sukkavallaamik atuutilersinneqarnissaannut mianersoqqusivoq.
Naalakkersuisut ernianut aningaasartuutinut akileraarutitigut ilanngaateqarsinnaanermik atorunnaarsitsiartuaarusupput. Taarsiullugu ernianut tapiissutinik inissiamik pisinerup aserfallatsaaliinerullu aningaasalersornissaanut ernianut aningaasartuutinut sammitinneqartunik atuutilersitsisoqassaaq. Ernianulli tapiissutit nutaat ullumikkut ernianik ilanngaateqartarnertutulli naleqartiginavianngillat.
Taarsigassarsianut allanut assersuutigalugu biilinut, angallatinut imaluunniit atuinermi iluaqutissanut allanut ernianik ilanngaateqartarneq atorunnaarsilluinnarneqassaaq. Tassa imaappoq, innuttaasut assersuutigalugu biilinik angallatinillu pisinerinut ernianut aningaasartuutit akileraarutinit ilanngaatigineqarsinnaajunnaassapput. (Takuuk paasissutissanut boksi ullumikkut maleruagassanut tunngasoq)
Tamanna inatsisissatut siunnersuummi, Naalakkersuisunit aasaq manna siusinnerusukkut tusarniaassutigineqartumi, atuarneqarsinnaavoq.
Naalakkersuisut tusarniaanermut atortussani allapput, inatsisissatut siunnersuut inuinnaat ileqqaaruteqarnerulernissaannut tapersiissuteqassasoq ilimagineqartoq, "tamannalu inoqutigiit aningaasaqarnerannik patajaallisaaqataanerussasoq," kiisalu siunnersuut aamma inissiamik pisinissamut aserfallatsaaliinissamullu kajumissuseqarnerulersitsissasoq.
Aningaaserivik mianersoqqusisoq
Grønlandsbankenip siunnersuut tusarniaanerup nalaani misissuataarsimavaa, tamatumanilu immikkoortunut arlalinnut qularutiginnittoqarpoq.
Aningaaserivik ilaatigut ernianut ilanngaatit piffissami ukiunik tallimanik sivisussuseqartumi nalingisa affaannanngortinneqarnerannik siunnersuutip isumaqarsinnaaneranik isorinnippoq. Tamanna ilaatigut innuttaasunut initaarnerminnut atatillugu taarsigassarsiaqartunut aningaasaqarnikkut kinguneqassaaq – aammali innuttaasunut allatut ittunik biilinik imaluunniit qamuteralannik pisinermi taarsigassarsiaqartunut, taakkua ernianut ilanngaatip nalinga tamakkiisumik annaassammassuk.
- Sukkasuumik atorunnaarsitsiartuaarneq tamanna appasissumik akunnattumillu isertitaqartunut tuparujussuarnertut sunniuteqassaaq, aningaasat atorsinnaasat tatineqassammata, Grønlandsbanken tusarniaarnermut akissutini allappoq.
Aningaaserivik tamatuma saniatigut Danmarkimut innersuussivoq, tassani ernianut ilanngaatip nalinga piffissami ukiorpassuarnik sivisussuseqartumik annikilliartuaartinneqarsimammat, matumanili Namminersorlutik Oqartussat allannguutinik annertuunik ukiut tallimat ingerlanerinnaanni atuutilersitsinissamik siunertaqarlutik.
Qaffasissunik isertitalinnut iluaqutaanerpaassasoq
Naalakkersuisut tusarniaarnermut atortussani tunngavilersuipput, ernianut ilanngaateqarsinnaatitaaneq appasissunik akunnattunillu isertitalinnut annikinnerusumik iluaqutaassasoq, nalinginnaasumik annertuunik taarsigassarsisinnaassagaanni patajaatsumik isertitaqarluartuunissaq piumasaqaataasarmat:
- Tamatuma saniatigut tamanna pissuteqarpoq, ilanngaatip nalinginnaasup inuppassuit ilanngaatinik iluaqutiginnittannginnerannik isumaqarneranik, aningaasartuutit ilanngaatigineqarsinnaasut pisuni arlalippassuarni ilanngaatinit nalinginnaasunit 10.000 koruuniusunit appasinnerusarmata, siunnersuummi allassimasoqarpoq.
Grønlandsbanken naliliivoq, Naalakkersuisut pisariinnerusumik periaaseqarnikkut agguaasseqqinnermik assingusumik angusaqarsinnaasut, ilanngaatip appasinnerpaaffissaata qaffanneratigut ilaatigullu akileraarutinik qaffaanermik tapertalerneratigut.
Siunnersuut akuersissutigineqassappat, tamanna nunatta karsianut 2028-mi ukiumut 11,3 millioner koruuninik isertitaqarnerussutaassasoq ilimagineqarpoq.
Ilanngussaq ataaniittoq tusarniaanermut atortuneersuuvoq, tabelimilu takutinneqarpoq, innuttaasut qanoq amerlatigisut pineqartunik ernianut aningaasartuuteqarnerat. Innuttaasunut isertitat immikkoortuinut ima agguataarneqarsimapput:
