Inatsisissatut siunnersuut akerleriissutaasoq: Maannakkut tusarniaanermi akissutigineqartut 40-t missaat suliarineqassapput
Aalisarnermut Piniarnermullu Naalakkersuisoqarfik aalisarnermut inatsisissatut siunnersuutip tusarniaassutigineqarnerani 40-t angullugit akissuteqarfigineqarsimavoq. Tusarniaanermi akissutigineqartut siunertaqarpata, siunnersuutip naleqqussarnissaa maanna aallartinneqassaaq, naalakkersuisoq oqarpoq.
Aalisartut ikilisarnissaat suliffissuilluunniit matunissaat Naalakkersuisut sulissutiginngilaat. Tallimanngornermi ullaap tungaani tusagassiortunik katersortitsinermi taama oqarpoq aalisarnermut piniarnermullu naalakkersuisoq Kim Kielsen (S).
Aalisarnermut inatsisissatut siunnersuut arlalinnit sakkortuumik isornartorsiorneqarpoq, Naalakkersuisulli aalisarnerup ineriartortinnissaanut aalisartullu periarfissaqarnerulernissaannut periarfissanik pilersitsiniartut Kielsenip erseqqissarpaa.
Aalisarnermut piniarnermullu naalakkersuisoqarfik sapaatip-akunnerini arfineq-pingasuni tusarniaanermi 40-t angullugit akissuteqarfigineqarsimasoq, Kielsen nangilluni oqarpoq.
- Tusarniaanermi akissutit taama amerlatigisut tigusimagatsigit nuannaarutigeqaara. Maanna tusarniaanermi akissutit misissorneqassapput, taakkulu siunnersuutitsinnut siunertaqarluarpata, akissutit siunnersuummut naleqqussarneqassapput, Kim Kielsen tallimanngornermi tusagassiortunik katersortitsinermi oqarpoq.
Aalisarnermut inatsisissatut siunnersuutip, Inatsisartut upernaakkut ataatsimiinneranni aalajangiiffigineqartussap, suliarineqarnera pillugu oqaluttuarluni Kim Kielsen tusagassiortunik katersortitsivoq.
Annerpaamik peqataatitsilluni sulisoqassasoq
Aalisarnermut inatsisissatut siunnersuut sivisuumik suliarineqarsimavoq, ataatsimiititaliarsuarmik, isumaliutissiissummik maannalu inatsisissatut siunnersuutissamik Naalakkersuisut tulleriiaarlugit suliarinnittuuffigisaannik kinguneqartumik.
- Inatsisissatut siunnersuut sukumiisumik suliarineqarpoq, peqatigiiffiit kattuffiit kiisalu partiit peqataatillugit. Maanna tusarniaanermi akissutigineqartut tamaasa misissoqqissaartariaqarpavut, inatsisissatullu siunnersuutip Inatsisartunut saqqummiunneqarnissaa sioqqullugu qanoq naleqqussaaffigineqarsinnaanera isummerfigisariaqarparput, Kim Kielsen oqarpoq.
Inatsisissatut siunnersuutip aalisarnermi atugassarititaasut maanna atuuttumit ajornerulersinnissaat siunertarinngikkaa, aamma aalisartut IOK-p aaqqissuussineranut nuunnissaminnut pinngitsaalineqarnavianngitsut erseqqissarpaa.
Pisassiissutinik killilersuineq aalisarnermik inuussutissarsiuteqartunut aarlerinartoq
Siunnersuut maannakkutut isikkoqarluni akuerineqarpat akiliisinnaajunnaartoqangaatsiarnissaa ilimagineqarsinnaasoq, inuussutissarsiortut aamma isornartorsiuipput. Kielsenili annilaanganngilaq, erseqqissarpaami nunatsinni inuussutissarsiornerup pingaarnerup atugassarititaasut pitsaasut ingerlatiinnassagai.
- Aalisartut periarfissaqalersinniarpavut, siunissamut ungasissumut pilersaarusiornissamut periarfissaqalersinniarlugit, inuussutissarsiullu siunissami qulakkeerniarlugu. Ukiut qulit qaangiuppata inuussutissarsiummik suujunnaarsitsinissaq siunertarinngilarput. Soorunami pisassiissutit piujuartitsinerlu oqimaaqatigiissarneqartariaqarput, tamannalu sulissutigaarput, Kim Kielsen oqaluttuarpoq.
Siunnersuut assortuussutaasoq tusarniaassutigineqarpoq januaarip 24-at tikillugu, tamannalu sivikippallaartutut isornartorsiorneqarsimavoq. Piniarnermut aalisarnermullu naalakkersuisup Kim Kielsenip erseqqissarpaa tusarniaassutigineqarnera isumaqanngitsoq aalisarnermut inatsimmik nutaamik atuutilersitsisoqassasoq, inatsisissamilli suliaqarneq tusarniaanermi akissutit atorlugit ingerlanneqassasoq.
- Aalisarneq nunatsinni aningaasarsiornerup annertunerpaaffianiitillugu inatsisissatut siunnersuut nutaaq sukumiisumik tamanillu peqataaffigineqartussamik suliarineqartariaqartoq, Kim Kielsen erseqqissaavoq.