Inatsit allaanerusumik nassuiarneqartussanngorpoq: Angerlarsimaffeqanngitsunik aalisarnerup iluani suliunnaarsitsissaaq

Inuttalersuineq pillugu nalunaarummik nutaamik nassuiaaneq aggustip 1-ani 2023-mi atuutilissaaq. Tamanna ilaatigut aalisariutaatileqatigiiffiit kilisaatiminni angerlarsimaffeqanngitsunik sulisoqarsinnaajunnaanerannik kinguneqassaaq. Tamannalu aalisariutaatileqatigiiffiit inuussutissarsiortullu kattuffiata nikussaarutigaat.

Kilisaammi patajaassuseqarpoq sinaakkuteqarlunilu aalajangersimasunik Tamanna sulisunut arlalinnut ulluinnarni aalajangersimasumik najugaqarfeqanngitsunut qimarraviuvoq.

Inatsit 2011-mi akuersissutigineqartoq maanna aalisariutaatileqatigiiffinnut sualuttumik ajornartorsiortitsilerpoq.

Ajornartorsiut tassaavoq Kalaallit Nunaanni aalisariutinik inuttalersuineq pillugu inatsimmik nutaamik nassuiaaneq, tamannalu aalisariutaatileqatigiiffiit sulisutik kilisaammut aallaqataasimappata ukiunilu kingullerni marlunni minnerpaamik qaammatini 14-ini najugaqarnermut uppernarsaammik takutitsisinnaanngippata koruuninik tuusintinik arlalinnik akiligassinneqartalernerannik kinguneqassaaq.

- Isumaqarpunga inunnik kalaaliusunik soraarsitsisussanngortitaalernerput ileqqorissaarnikkut kukkunerusoq, taakkuami illersorniarlugit inatsit suliarineqarsimavoq, maannali suliffeqarfimmit ajattorneqarnissaannut atorneqalersussanngorluni, Polar Seafoodimi pisortaq, Bent Salling, oqarpoq.

Inatsit eqqunneqarpoq, kilisaatini sulisut nunaqavissut aalajangersimasumik amerlassuseqarnissaat qulakkeerniarlugu. Kisianni nassuiaaneq nutaaq aggustip 1-ani atuutilersussaq aqqutigalugu nalunaarut kukkusumik eqquisussanngortoq, suliaqarfimmit isumaqartoqarpoq.

- Angerlarsimaffeqanngitsortatsinnut suliffimmik annaasaqarneq sunniutilerujussuusarpoq. Assigiinnarpaa inummik uppisimareersumik tukertaalluni. Taakkua ilaannut tamanna inuunerminni aaqqissuussaasumik ingerlatatuaasarpoq, suliffeqarlutik patajaassusermillu misigisaqarlutik, Bent Salling itisiliivoq.

Kingunissaa ilisimanngikkaat

Taamalu isumaqartuni kisimiinngilaq. Qajaq Trawl A/S-imi aamma pakatserujussuartoqarpoq.

-KANUAANA inuit kilisaammi aaqqissuussaasumik ulluinnarni inuuneqartarnerannik, sulinngiffeqarnerminni naammattumik 'angalaqattaareersimallutik' ikeqqikkaangamik qilanaarilluinnartagaannik, tamakkiisumik aseruerujussuaratarsinnaavoq. KANUAANA ilisimasaqarnani maani pissusilersornermik killilersuiniarsarivoq. Alloriarniarput ilisimanngisaminnik kinguneqartussamik, Qajaq Trawl A/S-imi pisortaq, Søren Brandt, oqarpoq.

Aalisariutaatileqatigiiffiit taakkua marluk arlalinnik sulisoqarput pappiaratigut angerlarsimaffeqanngitsunik, sulinngiffeqaraangamik ilaquttaminni, aappaminni ikinngutiminnilu immaqa nalaasaarfimmik siniffissaqartaraluarlutik.

Sulisitsisut naapertorlugit maluginiarnarnerpaaq tassaavoq, inatsisip 2011-mili atuussmanera, kisianni aatsaat maanna nassuiarneqalernera taamalu angerlarsimaffeqanngitsut aalisarnermi sulisorineqaqqusaajunnaartussanngornerat.

- Malittarisassani allanngortitsinani allaallu inuussutissarsiortut tusarniaavigeqqaarneranik allaanerusumik nassuiaanissap toqqarneqarsimanera tupigisorujussuuaarput. Nassuiaanermik taamatut allanngortitsineq tamanna immini ajornartorsiutaavoq, inuussutissarsiortunut sulisutsinnullu sinaakkutissatigut atugassarititaasut patajaatsuunnginnerannik ersersitsisoq, Sulisitsisuni pisortaq, Christian Keldsen, oqarpoq.

Malittarisassani innuttaasut inissaqartinneqarsinnaassapput

Taanna erseqqissaavoq, malittarisassat inatsisillu inuiaqatigiinnut minnerunngitsumillu inuit inooriaasiannut naapertuunniartussaagaluartut.

- Umiartortorpassuit pikkorissut aalajangersimasumik najugaqanngillat, piffissartilli angalanerit, aapparmiinnernit ilaquttaniinnerillu kiisalu attartukkat sivikitsut akornanni agguataarnissaat toqqartarlugu. Inuiaqatigiinnit najukkatsinnit inuit taamatut imminnut aaqqissuussimasut inissaqartinneqarsinnaasussaapput, tamannami immikkuullarissuunngilluinnarpoq. Kisianni tamanna inuttalersuinermut malittarisassanit killilerneqarpoq. Aamma eqqaamassavarput inuppassuarnut initaarniarnissap ajornakusoortorujussuunera, taanna oqarpoq.

Bent Sallingip tupigusuutigaa, KANUAANA-p politikerillu ajornartorsiummik aaqqeerusunnginnerat, angerlarsimaffeqanngitsut aalisarnermi suliffeqartut nunatta karsianut akileraarutinik akiliuteqartarmata taamalu inuiaqatigiinnut ajunngitsumik tapersiissuteqartarmata. Taanna isumaqarpoq, inunnut najugaqarnermut uppernarsaateqanngitsunut aaqqiissutissamik nassaarniarnissaq KANUAANA-mut kommuninik suleqateqarluni pisinnaasariaqaraluartoq.

- Uagullu ikiuussinnaavugut. Ikiuukkusuppugut, nuannaarutigisatsinnik, taanna oqarpoq.

Aaqqiivigineqarsinnaasariaqarpoq

Inuussutissarsiortut kattuffiallu isumaqarput, ajornartorsiutip ilarujussua inuussutissarsiutip tusaaniarneqartannginneranut tunngassuteqartoq.

- Tusarniaavigineqaqqaarata inuussutissarsiummut sinaakkutitigut atugassarititaasunik allanngortitsisoqaraangat tamanna tamatigut ajornartorsiutaassarpoq. Ilisimasaqarpugut malittarisassanik nutaanik atuutilersitsisoqannginnerani kingunissanik pissusissamisuunngitsunik tikkuaasinnaanitsinnik kinguneqartunik, Christian Keldsen oqarpoq.

Bent Salling aaqqiissutissamik nassaarniarluni KANUAANA-mik ataatsimeeqateqartarsimagaluarpoq, iluatsitsisimananili.

- Maannamut suli qanoq pisoqarsimanngilaq malittarisassanillu nutaamik nassuiaanerup atuutilerfissaa qanilliartorluni. Neriuppunga ajornartorsiut politikerinit qanoq iliuuseqarfigineqassasoq. Tamannami attanneqarsinnaanngilaq aamma Kalaallit Nunaanni inuussutissarsiutit pingaarnersaat pineqarpoq.

Sermitsiaq.AG KANUAANA-mit oqaaseqartitsiniarsarivoq sooq nalunaarummik nassuiaanerup allanngortinneqarnissaa toqqarneqarsimanersoq pillugu.

Powered by Labrador CMS