'Ineqarneq pillugu suliami' eqqissiviilliorneq: Attartortitsisup inissiat 73-it attartorunnaarsinniarpai
Niuertoq Jackie Lyng pisortanit 28 millionit koruuninik taarsigassarsiaminik tamakkiisumik akileeqqusaareernerup kingorna, inissianik 73-inik attartortitsinermut Kommuneqarfik Sermersuumik isumaqatigiissuteqarnini taamaatiinnarniarpaa.
Ineqarneq pillugu suliamik taaneqartumi ajornartorsiutinik Kommuneqarfik Sermersooq suli aaqqiiuminaatsitsivoq.
Assi: Leiff Josefsen
Ineqarneq pillugu suliaq allanngoqqippoq, tassami inuussutissarsiortup, Kommuneqarfik Sermersuup Namminersorlutillu Oqartussat akornanni inissiani 73-ini attartortut aaqqiagiinngissummut ilanngunneqarmata.
Taarsigassarsiat arlallit unioqqutitsilluni taarsigassarsiarineqartutut nalilerneqartut akilerneqarnissaat Namminersorlutik Oqartussat piumasarimmassuk tamanna pivoq. Tamanna pissutigalugu inuussutissarsiortoq Jackie Lyng Kommuneqarfik Sermersuumut attartornermut isumaqatigiissuteqarnerminik taamaatitsiniarluni nalunaaruteqarpoq, pisortanit taarsigassarsiat 28,5 millionit koruunit tigummiinnarsinnaanngikkunigit.
Jackie Lyng naapertorlugu attartornermut isumaqatigiissummi inissiat 73-it pineqarput:
- Maanna aningaasatigut tatineqarnikkut kommunimik attartornermut isumaqatigiissutitsinnik taamaatiinnartariaqarama, ilaqutariillu 73-it angerlarsimaffeeruttussanngormata Nuuk City Invest ApS-imik piginnittutut attorneqangaarpunga aliasungaarlungalu, Jackie Lyng tusagassiuutinut nalunaarummi allappoq.
Ingerlaannaq akiliinissamut peqquneqarsimasoq
Pisortanit taarsigassarsiat 28.500.000 koruunit ingerlaannaq utertinneqartariaqartut ineqarnermut attaveqarnermullu naalakkersuisoqarfimmit kommune peqquneqarsimasoq, Jackie Lyng naapertorlugu marsimi kommunimit allagarsivoq.
Attartornermut inatsit naapertorlugu Jackie Lyngip ingerlatseqatigiiffiutaa Nuuk City Invest pisinnaatitaaffimminit kommunimut amerlanerusunik attartornermut akilerneqartartoq naalakkersuisoqarfik naliliimmat, akiliinissamut peqqusineq pivoq.
Ineqarnermut akiliut appartilluinnarneqassasoq naalakkersuisoqarfimmit piumaffigineqarsimalluni Jackie Lyng allappoq. Maannakkut attartornermut isumaqatigiissut atuuttoq naapertorlugu taamaaliussaguni akiliisinnaajunnaassalluni allappoq. Taamaattumik attartornermut isumaqatigiissut atorunnaarsinniarpaa inissiallu akunnittarfinngortinniarsarinialerlugit.
Sumut nuussappat?
Namminersorlutik Oqartussani naalakkersuisoqarfik Jackie Lyngip sakkortuumik isornartorsiorpaa. Namminersorlutik Oqartussat ingasattajaartut ilaqutariippassuarnillu angerlarsimaffeerutitsisinnaasut isumaqarpoq.
- Naluara kommunip sumut nuunnissaat pilersaarusiorsimaneraa, innuttaasut maanna inissiani attartukkani najugaqartut pillugit allappoq.
Inuussutissarsiutigalugu attartornermut isumaqatigiissummi kommuni pisussaaffimminik eqqortitsisimanini tunngavigalugu, Nuummi Nuukullak 3-mi inissiani 73-ini attartortunut suliaq kinguneqassanngitsoq Kommuneqarfik Sermersuumi pisortaaneq Ole Jakobsen allakkatigut akissuteqarluni oqarpoq.
Kommunimi pisortaaneq: Anisitaasoqannginnissaa qulakkeerniarparput
- Kommunip inissiamillu piginnittup akornanni suliaq ingerlasoq, attartortullu tamatumunnga peqataanngitsut, attartortut tamaasa eqqissisarusuppakka. Suliap malitsigisaanik attartortunik anisitaasoqannginnissaa soorunami kommunip qulakkeerniarpaa, Ole Jakobsen oqarpoq.
Kommunimi pisortaq naapertorlugu „ajornartorsiutip aaqqinneqarnissaa inuussutissarsiutigalugulu attartornermut isumaqatigiissutip naleqquttumik annertussuseqarnissaata qulakkeerneqarnissaa" suleqatigiissutigineqaleruttorpoq.
- Ataaserli qularnanngilaq – Kommuneqarfik Sermersooq Iserit A/S-ilu inuussutissarsiutigalugu attartornermut isumaqatigiissummik unioqqutitsisimanngillat, taamaammat attartortut anisitaanavianngillat, Ole Jakobsen oqarpoq.
