Ingerlatseqatigiiffik ilaasut Air Greenlandimit taarsiifigitinnissaannut ikiuuttartoq
Flypenge.dk ilaasut kinguaattoortoqarnerani taamaatitsiinnartoqarneraniluunniit Air Greenlandimit taarsiiffigeqquneqarsimasut pillugit 74-inik suliaqarpoq. Air Greenland ingerlatseqatigiiffinnit allanit ajornerunanilu pitsaanerunngilaq, flypenge.dk-mit ilisimatitsissutigineqarpoq.
Timmisartup kinguaattoornera pissutigalugu taarsiiffigitinnissamik suliaq alla decembarimi ilaasumut iluaqutissanngorlugu aalajangiiffigineqarpoq. Ingerlatseqatigiiffik Flypenge.dk ilaasoq pineqartoq pillugu suliamik ingerlatsisimavoq, suliarlu immikkuullarissuunngitsoq, pisortaq oqaluttuarpoq.
Flypenge.dk-p Air Greenlandimut atatillugu suliarisimasai
2018-imi suliat: 135
2019-imi suliat: 165
2020-mi suliat: 9
2021-mi suliat: 65
Flypenge.dk-mit ilisimatitsissutigineqarpoq, 2020-mi suliat amerlassusaat corona pissutaalluni matooraasimanermit tunngaveqartutut isigineqassasut.
Suliffeqarfik maannakkorpiaq Air Greenlandimut atatillugu 74-inik suliaqarpoq. Ilaasut arlallit kinguaattoornermut aalajangersimasumut ilaasussaasimasinnaasut, suliffeqarfimmit ilisimatitsissutigineqarpoq.
Flypenge.dk timmisartumut ilaasut timmisartuutileqatigiiffinnit tamanit taarsiiffigitinnissamik qinnuteqaataannik suliaqartarpoq, 2018-illu aallartinneranili atuussimalluni. Air Greenland timmisartuutileqatigiiffinnit nalinginnaasunit ajornerunanilu pitsaanerunngitsoq, pisortaq Dekan Salar Sermitsiaq.AG-mut oqaluttuarpoq.
- Ilaasut kinguaattoortoqarnerani, taamaatitsiinnartoqarnerani taarsiiffigitinnissamillu piumasaqaamminnik isumaginnittoqartarnerani misigisartagaat eqqarsaatigalugit, Air Greenland timmisartuutileqatigiiffiit qeqqata missaanni inissisimavoq.
Eqqartuussivitsigoortitsisarneq pisariaqartariaqanngikkaluartoq
Sullitat taamaatitsiinnartoqarnerani kinguaattoortoqarneranilu taarsiiffigitinnissamik kissaateqarnerat eqqarsaatigalugu timmisartuutileqatigiiffiit suliaqaqquneqartarnerat immikkuullarissuunngilaq.
- Pitsaasortaa eqqarsaatigalugu oqaatigineqassaaq, Flypenge.dk-p piffissami kingullermi Air Greenlandimik oqaloqateqartarnera pitsaanerulersimasoq, tusarnaarneqartarlutillu misigisimasut. Akerlianik suli suliaqarpugut eqqartuussivitsigoortinneqartariaqartunik, malittarisassallu erseqqilluinnartuummata tamanna qaqutigoornerusariaqaraluarpoq, Dekan Salar oqarpoq.
Air Greenlandimit allakkatigut Sermitsiaq.AG-mut akissuteqarnermi erseqqissaassutigineqarpoq, sullitanik oqaloqateqartarneq pingaartinneqartuaannartoq.
- Flypenge.dk-p uatsinnik oqaloqateqartarnini pisaanerulersimasoq erseqqissaassutigimmagu nuannaarutigaarput, tamannami sukkulluunniit anguniartuartaratsigu.
Suliamik misissuititsineq akeqanngitsoq
Air Greenlandimilli isumaqarput, ilaasut angalanerminni ajornartorsiutiminnik ikiorserneqarniarlutik suliffeqarfimmut toqqaannartumik saaffiginnittariaqartut mener dog, at passagererne kan tage den direkte kontakt til virksomheden for at få hjælp ve.
- Air Greenlandimi sullitanik toqqaannartumik oqaloqateqartarnissaq pingaartipparput, taamaammat Sullitanik kiffartuussivitta toqqaannartumik attaveqarfigineqartarnissaa inassutigaarput, tassuunakkummi angalaffissat ataasiakkaat taamaatiinnarneqarneranni pisinnaatitaaffiit pillugit pitsaanerpaamik siunnersorneqarnissaq pisariaqarmat, EU-miimmi EU-llu iluani angalanerit apeqqutaallutik imaluunniit Kalaallit Nunaata iluani angalasoqarnersoq apeqqutaalluni malittarisassat assigiinngitsuupput, Air Greenland allakkatigut akissuteqarluni allappoq.
Taamaakkaluartoq ilaasut arlaqarput Air Greenlandimit taarsiiffigitinniarnerminni suliffeqarfimmik Flypenge.dk.mik pisariaqartitsisut.
EU-mi peqqussut taarsiiffigitinnissamut attuumassuteqartoq piumasaqaatinik ukiuni pingasuni atuutsitsisarpoq, taamaamma 2018-imi decembarip qaammataani taarsiiffigitinnissamik qinnuteqaatit suli piumasarineqarsinnaapput. Suliamik flypenge.dk-mut misissuititsineq akeqanngilaq, suliarli taarsiiffigitinnermik inerneqaraangat sullissinermut taamaallaat akiliuteqartoqartarluni, Flypenge.dk-mit ilisimatitsissutigineqarpoq.