Ingerlatseqatigiiffik imermik tunisassiorniartoq akiliisinnaajunnaarpoq
Iluimeq imermik Kalaallit Nunaanneersumik nunarsuaq tamakkerlugu tuniniaasalerniaraluarpoq, suliffeqarfilli maanna akiliisinnaajunnaarpoq.
Suliffeqarfiup Arctic Ice Cap Waterip sikuminerit aatsitat puiaasumut immuterialugit, nunarsuarmi puilasut erngatut minguinnerpaatut taallugu tuniniarneqartarnissaa siunertarisimagaluarpaa.
Ingerlatseqatigiiffilli imermik tuniniaasarnissamik suliniuteqartoq akiliisinnaajunnaartutut maanna suliarineqarpoq, nittartakkami konkurser.dk-mi tamanna atuarneqarsinnaavoq.
Ingerlatseqatigiiffik Iluimeq siusinnersukkut Arctic Ics Cap Waterimik taaguuteqarsimagaluarpoq, martsilli qaammataata 24-ani akiliisinnaajunnaartutut nalunaarutigineqarluni.
Eqqartuussissuserisut Malling & Hansen Damm akilisiinnaajunnaartup pigisaanik isumaginnittuuvoq, eqqartuussissuserisullu ilisimatitsissutigaa, Iluimeq pisussaaffimminik ukiumoortumik naatsorsuutinik tunniussisimanngitsoq, taamaammallu Inuussutissarsiornermut Aqutsisoqarfimmit Iluimeq atorunnaartussatut peqqussutigineqarsimalluni.
Ingerlatseqatigiiffik nalilinnik pigisaqanngilaq, piumasaqaammilli tunineqarsimavoq. Taamaammat akiliisinnaajunnaartutut suliarineqarpoq, eqqartuussissuserisut oqaatigaat.
Akuersissut atorunnaarsinneqartoq
Naalakkersuisut, Iluimeq Qeqertarsuup Tunuani ilulissanik Danmarkimut assartugassanik katerseriarluni puiaasanut immiussisarnissaanut, akuersissummik tunisimavaat. Piumaxaqaataasimalluni erngup puilasumeersup tunineqarnerani Namminersorlutik Oqartussat royaltiesinik pissarssarnissaat.
Akuersissut taanna maanna atorunnaarsinneqarpoq:
- Suliffeqarfiit imermik niueruteqarnissamut akuersissutaatillit akiliisinnaajunnaartutut suliarineqartannginnissaat piumasaqaataammat, Iluimeq taamatut akuersissummik , pigisaqarsinnaajunnaartitaavoq, Inuussutissarsiornermut Naalakkersuisoqarfik mailikkut allappoq.
Angut imermik nioqquteqarniartoq suliniummik nutaamik aallartitseqqittoq
Iluimeq matuneqareeraluartoq, tamatumannga aallarnisaasimasoq Peder Pedersen ingerlatseqatigiiffik alla aqqutigalugu imermik puilasumeersumik tuniniaasarnissamik suliaqarluni aallartitsisimavoq.
Peder Pedersen Iluimermi siusinnerusukkut pisortaasimavoq, taannalu Sermitsiaq.Ag-mut ilisimatitsivoq suliniutinik nutaanik aallartitsisimalluni:
- Greenland Ice Cap Water, Greenland Water Bottling sinnerlugu imermik siumillu aallertarnissamut pisinnaatitaaffeqarnissamut qinnuteqarsimavoq, Ilulissani maqitsisarnissaq pilersaarutaavoq, Peder Pedersen allappoq.