Innaarsunni eqqagassarpassuit ajornartorsiutaasut
Innaarsunni anartarfilerisoqaranilu eqqaavilerisoqanngilaq, piaartumillu iliuuseqartoqartariaqartoq, nunaqarfimmi niuertoq piumasaqarpoq. Aaqqissutaasinnaasunilli ujartuisoqartoq, Avannaata Kommuniani kommunalbestyrelsimi Teknikkimut Ataatsimiititaliami siulittaasoq oqarpoq.
Upernaviup eqqaani nunaqarfinni qulingiluaasuni Innaarsuit 170-t missaannik inoqartoq kisiartaalluni anartarfilerisoqaranilu eqqaavilerisoqanngilaq, tamattumillu eqqagassarpassuit anartarfiillu puussiartai imallit nunaqarfiup iluani eqqaavissuullu eqqaani katersuutiinnartut amerlalluinnalersimapput.
Aviisi Sermitsiaq taama allappoq.
Innaarsunni qulimiguulinnut mittarfik eqqaavissuarmiit 50 meterit missiliorlugit ungasitsigisumiimmat, eqqakkallu sillimaniarnermut akornutaammata piffissami matumani mittarfik matuneqarallartariaqartoq, Mittarfeqarfiit nalunaarut. Eqqaaveqarnikkullu ajornartorsiut aaqqiiviginiarlugu piaartumik iliuuseqartoqartariaqartoq, Innaarsunni Pilersuisup pisiniarfiani niuertoq piumasaqarpoq.
- Avannaata Kommuniani nunaqarfinni illoqarfinnilu arlaqartuni eqqaavilerinikkut anartarfilerinikkullu suli annertuumik unammilligassaqartoq aaqqiissutaasinnaasunilli ujartuisoqartoq, Avannaata Kommuniani kommunalbestyrelsimi Teknikkimut Ataatsimiititaliami siulittaasoq, Niels Davidsen, Inuit Ataqatigiit, oqarpoq.
Isumaqatigiissut atorunnaarsinneqartoq
Akissarsiat appasippallaanerat pissutaalluni anartarfilerisunik eqqaavilerisunillu sulisussaqarniarneq annertuumik ajornartorsiutaavoq, ajornartorsiulli anigorniarlugu akissarsiaat 70 procentimik qaffanneqassasut, Avannaata Kommunia SIK-lu martsimi isumaqatigiissuteqaraluarput.
Aviisimi Sermitsiami atuarnerusinnaavutit. Aviisi uani pissarsiariuk:
