Innuttaasunik ataatsimiititsinerni suliffissat apeqqutigineqarput
Nuuk aamma Aasiaat ukioq manna uuliasiortunut umiarsualiviunissaq unammissutigaat
Ulluni kingullerni innuttaasunik ataatsimiititsisarnerni sisamani Skotlandimiut uuliasiornermik ingerlatsisut Cairnikkut ingerlataanni apeqqutit amerlasuut nunami suliffissanut tunngasuupput.
Aasianni inuit 60-it, ilulissani inuit 30-t, Kangerlussuarmi inuit 20-t kiisalu Nuummi inuit 60-it ataatsimiititsinerni peqataapput, taakku apriilip 15-iata tungaanut Cairni 2011-mi qillerinissamut pilersaarutai pillugit tamanut ammasumik tusarniaanermik malitseqassapput.
Ingerlatsivik - imaluunniit eqqornerusumik oqaatigalugu ingerlatsivik Kalaallit Nunaanni pigisaq Capricorn - oqartussanut qinnuteqarpoq katillugit sisamanik qilleriniarluni, uuliasiorfinni ukunani Lady Franklin aamma Atammik Nuup kitaani, Eqqua Qeqertarsuup kitaani aamma Napariami Siggup Nunaata kitaani.
Cairnimit qilleriffik »Leiv Eiriksson« aamma umiarsuaq qilleriffik »Corcovado« Norgemiut umiarsuaatileqatigiffiannit »Ocean Rig«
Nuuk imaluunniit Aasiaat
– Ukioq manna pilersaaruterput siorna qillerinermi pilersaarutitsinnut assingusorujussuussaaq, Cairnip Kalaallit Nunaanni sulisua Tor B. Lund oqarpoq, Nuummi GUp timersortarfiani arfininngormat ualikkut innuttaasunik ataatsimiititsinermi.
Ilulissat aamma Kangerlussuaq inissereerput. Ilulissat helikoptereqarfiussapput aamma Eqquani kiisalu Napariami qillerinisamut iluarsaassarfik tamaaniissaluni, taanna helikopteriutilinnit Cougar Helicoptersinit attartugaavoq. Kangerlussuarmut, sulisut paarlakaattut Edinbourgimit timmisartumik, tikittassapput aallartassallutillu tamaanngaanniillu qilleriffinnut aamma umiarsuanut pilersuisunut angallanneqartassallutik.
Taamaattumik Aasianni aamma Nuummi susoqarnissaa soqutigineqarpoq. Sorleq 2011-mi uuliasiornermut pingaarnertut umiarsualiviussava?
Cairnimit pilersaarutigineqarput Nunatta Qeqqani qillerinissaq marluk, immaqa pingasut aamma Nunatta Avannaani ataaseq immaqa marluk, ingerlatsiviullu periarfissat taakku marluk imatut nassuiarpai 3+1 imaluunniit 2+2. Sorliup toqqarneqarnissaa suli aalajangiiffigineqanngilaq.
Imaassinnaavoq ingerlatsiviup qillerinissani Nuup kitaani aallartikkai, tamatumunga pissutaavoq Nunatta kitaani ilulissat juuni ikinnerusarnera Nunatta Avannaanut sanilliullugit. Apeqqutaatillugu neriunartumik - imaluunniit pakatsinartumik Nuup kangiani qillerineq inerneqassagaluarpat, taava Cairnimit aalajangerneqassaaq ukioq manna qillerinissani sisamaasuni kinguullit marluk sumi ingerlanneqassanersut.
Cairnip 2010-mi pilersaarusiorpaa Siggummi Qeqertarsuup kitaani sisamariarluni ujarlerluni qillerniarluni, kisianni pingasuinnaat angumeraat. Qillerivinni marlunni uuliaqarneranik aamma qasseqarneranik ilimaateqarneranik nassaartoqarpoq, taakku uppernarsarpaat nunap sannaata akui uuliamik aamma gassimik pilersitsisinnaanermut tunngaviusut.
Cairn katillugit akuersissutinik aqqanilinnik Nunap Isuanit Baffinip Kangerliumarrngata tunngaanut, kiisalu 2011-mi qilerinissamut anguniakkani Sigguk puigorneqanngilaq, kisianni misissuiffissat nutaat sisamat. Ingerlatsiviup akuersissutit pigisani amerlasuut imminnullu ungasillutik immikkoortuuneri pissutigalugit nunap immikkoortuini periarfissanik nalilersuinerit ingerlappai nassaarniarnerminut - aamma uuliamik gassimillu piaaniarnerminut.