Inuilip allissutissaa
Narsami nerisassiornermik ilinniarfiup allilerneqarnissaa ajornartorsiutitaqarpoq
Siumut sinnerlugu Inatsisartunut ilaasortap Finn Karlsenip, Narsami nerisassiornermik ilinniarfiup allilerneqarnissaanik pilersaarutit paasisaqarfigissallugit soqutigaa.
Tamatumunnga tunngaviuvoq Inuilip allilernissaanik sanaartortut aasap ingerlanerani aningaasarsiaminnik maalaaruteqarsimammata.
- Paasitinneqarpunga sanaartortut piffissap sivisuup iluani aningaasarsitinneqarsimanngitsut, Finn Karlsen naalakkersuisunut apeqquteqaatiminut tunngavilersuivoq.
Tamatuma saniatigut Finn Karlsenip tikkuarpaa ilassutissamik sanaartortut arlaleriarlutik suliaminnik unitsitsiinnartarsimasut susoqarneranik ilisimatinneqaratik.
Tamakku tunngavigagit Finn Karlsenip ilimagaa suliaq pissusissaq naapertorlugu ingerlanneqanngitsoq.
Taamaattumillu naalakkersuisunut apeqquteqaatigaa sanaartornerup qanoq ingerlanera.
Aamma Finn Karlsenip paaserusuppaa sanaartortitsisut toqqakkat ilumut suliamik suliarinnittussaanersut, paaserusullugulu sooq sanasut kalaallit atorneqarsimannginnersut illuatungaani sanasut ilisimaneqanngitsut islandimeersullu atorneqarnersut.