Inuksuk Pituffiliartussanngortoq
Permagreen Grønland aamma Vectrus Services Greenland ingerlatseqatigiiffik Inuksuk tunngavigalugu Pituffimmi kiffartuussinermik suliassanik kivitsinissamut piareersimapput. Naammassineqarsimasussalli suli inissivissimanngillat, ingerlatseqatigiiffiit pingasut suliassamik tunineqanngitsut aalajangiineq pillugu suli naammagittaalliuuteqarsinnaammata.
Pituffimmi kiffartuussinissamut isumaqatigiissut juullinngitsiartoq ingerlatseqatigiiffiit suleqatigiissut ingerlatseqatigiiffiutaannut Inuksuk A/S-imut, Kalaallit Nunaanni sanasut suliffeqarfiannit Permgreen Grønlandimit aamma Amerikaiut suliffeqarfiannit Vectrus Services Greenlandimit pigineqartumut, tunniunneqarpoq. Ingerlatseqatigiiffiit taakkua marluk Inuksummik 51 procentinik aamma 49 procentinik piginneqataassuteqarput.
Aviisi Sermitsiaq taama allappoq.
Permagreen Grønland piginneqataassutit aktiat amerlanerpaartaannik piginnittoq tassaavoq Danmarkimi suliffeqarfik Per Aarsleff A/S, Vectrus Services Greenlandilu suliffeqarfissuarmit Vectrusimit, Amerikamiut nunarsuaq tamakkerlugu sakkutooqarfiinik sullissisumit, pigineqarluni.
Sakkutooqarfimmi erfalasoq nutaaq
Vectrus Services Greenlandip Pituffimmi kiffartuussinissamut isumaqatigiissut 2017-imiilli tigummisarisimavaa, suliassamulli kisimiilluni neqerooruteqarsinnaasimanani, Kalaallit Nunaanni Danmarkimiluunniit suliffeqarfiunissamik neqeroorusiorsinnaanermut atortussani piumasaqaammik naammassinninnginnami. Kisianni Permagreenilu suleqatigiillutik Kalaallit Nunaanni aktianik ingerlatseqatigiiffik Inuksuk pilersissinnaasimavaat suliassamullu neqerooruteqarlutik.
Aviisimi Sermitsiami atuarnerusinnaavutit. Aviisi uani pissarsiariuk:
