Inuussutissarsiornermik ilinniarfiit pillugit Sulisitsisut akipput
Inuussutissarsiornermik ilinniarfiusut ilinniartitaanermut naalakkersuisoqarfimmit aqunneqartalernissaannik, siulersuisunillu inuussutissarsiortunit ilaasortaqartunit soraarsitsinissamik Naalakkersuisut pilersaarutaat, Sulisitsisunit isornartorsiorneqarpoq.
- Inuussutissarsiornikkut ilinniarfinnut tunngatillugu inuussutissarsiortut sunik pisariaqartitsinerannik nalilersuinissamut inuussutissarsiortut piukkunnarnerpaapput, Sulisitsisut pisortaat, Christian Keldsen, oqarpoq, Naalakkersuisullu sooq ilinniarfinni siulersuisunik aaqqissuussineq atorunnaarsinniarneraat, ilinniarnermullu naalakkersuisoqarfimmi atorfilittat atuarfiit ingerlanerat pillugu sooq aalajangiisuutinniarneraat, taassuma paasisinnaanngilaa.
Atuarfinni arfineq-marluusuni tallimani periusissiamik suliaqartoqartoq Christian Keldsenip ilaatigut tikkuarpaa, taamaalillunilu siulersuisut suliassatik naammassigaat, inatsisillu allanngortinneqarnissaanik siunnersuutip tusarniaassutigineqarnera sioqqullugu nalunaarusiami Naalakkersuisunit suliarineqartumi tamanna atuarneqarsinnaavoq.
Taartisiaq
- Ilinniartitaanermut siunnersuisoqatigiinnik pilersitsisoqassaaq, inuussutissarsiortut siulersuisuni ilaasortaatinneqarusunnginnerannut taakku taarsiissapput, kisianni takusinnaasatsitut inuussutissarsiortut aalajangiisuusumik sinniisutullu inissisimaffeqanngillat, illuanik suliffeqarfiit kattuffiillu allat inuussutissarsiortut soqutigisaannik isumaginnissinnaanngitsut inissaqartinneqarput, Sulisitsisut pisortaat oqarpoq.
Taassuma tikkuarpaa, siulersuisut atorfillillu akornanni oqaloqatigiittarnerit annertuut Namminersorlutik Oqartussani uninngatinneqartarnerat unammilligassat ilagigaat.
- Taamaattumik naatsorsuutigineqarsinnaavoq, pisortat allaffissorneranni nukiit amerlanerusut atorneqartariaqartut, maanna ”sulisunut peqqussutit” atorlugit ilinniarfiit siulersuisoqanngitsut ingerlanneqalissappata, Sulisitsisut naliliipput, inatsisissamullu siunnersuut pillugu oqaaseqaatit issuarlugit.
- Taamaattumik millionit affaasa missaanni aningaasarsiassanik, angalanernut ilaalu ilanngullugit sipaarniartoqarsinnaanera ilumoorpasinngilaq. Siulersuisunut ilaasortat aningaasatigut iluanaaruteqarnissartik pillugu suliassatik suliarinngilaat, piffissarlu killeqartorujussuaq akilerneqartarlutik. Namminersorlutik Oqartussani suliassaqarfimmik tamatuminnga suliaqartussamik ataatsimik aalajangersimasumik atorfinitsitsisoqarpat, sipaarniuteqartoqarsinnaanera millionit affaasa missaanniittut qaangerneqarluinnassapput. Aammattaaq suliamut tunngasunik piginnaasaqarnerup annaaneqarnera, ilaatigut siunnersortitut sullissisunik pisinikkut taarserneqartussaq, eqqartorneqanngilaq, Christian Keldsen oqarpoq.
Ilinniartunut pisariaqartinneqartunik naammaginartumik amerlassusilinnik ilinniarfinnik pilersitsisimaneq, Namminersorlutik Oqartussat ilinniarfiit aaqqissuussaanerata allanngortinneqarneranut nassuiaat innersuussutigaa.
Asuliinnaavoq
- Tamannali asuliinnaavoq, Sulisitsisut pisortaat naqissusiivoq nangillunilu:
- Siulersuisunut ilaasortat toqqakkat praktikkerfissanik pilersitsinissamut ilaatigut pisussaaffilerneqarsinnaaneq ajorput, ilaatigullu praktikkerfissaqartarpoq - ilinniartussaqanngitsunik.
GE ukiuni kingullerni ilinniartut inissisimanerat pillugu misissuisimavoq, tassanilu takutinneqarpoq, ilinniartunut inissat neqeroorutigineqartut affaat sinnilaaginnarlugit (60 procentit missaat) inuttalerneqarsinnaasut.
- Tamatuma saniatigut ilinniartut amerlavallaartut ilinniarfimminniiginnarnissartik ajornakusoortittarpaat, tamatumunngalu arlalinnik pissuteqarpoq, kisianni uteqattaartut ilagaat meeqqat atuarfianni atuagarsornikkut periarfissalunneq, oqaatsinik piginnaasakippallaarneq, piumassuseqarpiannginneq il.il. Tamatumunnga ilanngullugu inuiaqatigiit ukiuni kingullerni qulini inuusuttorpassuit ilinniarnertuunngorniarfinni ilinnialertarnerat misigisimavaat, taamaalilluni inuusuttunik piukkunnaatilinnik inuussutissarsiornermik ilinniarfinni ilinnialertartunik ujaasineq akornuserneqarluni. Ullumikkut ukiumut ilinnialertartut ikippallaarput, tamannalu ilinniarnertuunngorniarfinni inuussutissarsiornermilu ilinniarfinni qinnuteqartartunut ajortumik sunniuteqarpoq, Christian Keldsen oqarpoq.
Sulisitsisut inatsisissatut siunnersuut tusarniaanermi akissuteqarfigalugu sunnerniarsarissavaat.