Inuussutissarsiortunut isumassarsiat nutaat
Grønlandsbankip aningaasaateqarfia GTE aamma GA januaarip naalernerani innuussutissarsiutinik ingerlatsisunik isumasioqatigiissitsiniarput aqutsineq, suleqatigiinneq aamma attaveqateqarneq qitiutillugit
- Kalaallit Nunaanni inuussutissarsiutinik ingerlatsisut ukiuni aggersuni annertuunik unammilligassaqarput ilaatigut ineriartornerit makkunani eqqarsaatigalugit aatsitassarsiorneq, uuliasiorneq aamma aluminiumiliorneq. Kalaallit Nunaanni suliffeqarfiit mikisut akunnattumillu angissuseqartut ineriartornermut piareersarneqartariaqarput attaveqateqarnernik suleqatigiinnermillu ingerlatsivinni suut samminerlugit kiisalu maannakkut inuussutissarsiutit aaqqissuussaanerat akimorlugu, aaqqissuussisut allapput.
Inuussutissarsiutinik ingerlatsisunik isumasioqatigiissitsinissami »Kalaallit Nunaanni suliffeqarfiit siunissami - aqutsineq, suleqatigiinneq aamma attaveqateqarneq« siunertaavoq Kalaallit Nunaanni inuussutissarsiutinik ingerlatsisut kaammattornissaat ineriartortinnissaallu.
- Ullutsinni suliffeqarfinnik ingerlatseriaaseq unammillerneqassaaq, taamaalilluni aqutsisup ataatsip naammagiinnassanngimmagit maanna tikillugu ajunngitsumik ingerlasimasut. Aqutsisoq taassumalu suleqatai atitunerusumik eqqarsarnissaminnut atugassaminnik pissarsisinneqassapput, atitunerusumik suleqatigiinnissamut kiisalu attaveqaateqartarnermut suliffeqarfiit aamma kattuffiit akornanni. Taamaalilluni piginnaasat assigiinngitsut ataatsimoortinnerisigut kaaviaartitat aningaasaqarnikkut ineriartorneq inuiaqatigiinni kalaallini suliffeqarfinni annertusiartorniassammata, isumasioqatigiinnissamut Katuami 28. aamma 29, januar 2009 ingerlanneqartussamut aggersaanermi oqariartuutaavoq.
Ulloq siulleq sammineqassapput qitiutillugit aqutsineq, suleqatigiinneq aamma attaveqateqarneq qanoq paasineqassanersut. Ullup aappaani qitiutillugit sammineqassapput aqutsinerup, suleqatigiinnerup aamma attaveqateqarnerup ataatsimoortinnissaannut suut atorneqarsinnaasut. Isumasioqatigiinnermi ingerlanneqassapput saqqummiussinerit, workshops aamma toqqaannartumik apersuinerit, kiisalu isumasioqatigiinneq unnuk kingulleq naggaserneqassaaq nerersuaqatigiinnermik aliikkusersuinertalimmik.