Inuussutissarsiortut akileraartarnermut inatsisissatut siunnersuut nutaaq suli isornartorsioraat

Nunatsinni inuussutissarsiortut isertitanut akileraarutinut inatsisissatut siunnersuutip nutaap ilaanut, maanna atuuttumut taartaasussamut, isornartorsiuileruttorput.

Inatsit qaammatit tulliuttut ingerlaneranni Aningaasaqarnermut Akileraartarnermullu naalakkersuisumit Múte B. Egedemit, IA, Inatsisartunut saqqummiunneqassaaq.

Nunatsinni aningaaserivinni siuttuusoq Grønlandsbanken inatsisissatut siunnersuutip ilaanik sakkortuumik isornartorsiuisunut ilannguppoq.

Maannamut Sulisitsisut, sanaartugassanik suliakkerneqartartoq Permagreen aamma eqqartuussissuserisut Arctic Law, Namminersorlutik Oqartussanut aamma Sermitsiamut tusarniaanermut akissuteqaamminni sakkortuumik mianersoqquseqqammerput.

Aningaaserivimmi pisortaq: - Nutaamik akileraarusiisoqalerpoq

Grønlandsbankenip pisortaanerata Martin Kviesgaardip Sermitsiamut oqaatigaa, inatsisissatut siunnersuut tassaasoq suliffeqarfinnut akileraarut nutaaq atuutilersinniarneqartoq, nunani allani taamaaliortoqarsimagunanngilaq.

Taassuma aningaaseriviullu inatsisissatut siunnersuut akerleraat, tassa suliffeqarfik assersuutigalugu Nunatsinniittoq piffissami sivikitsumi pisortamit Nunatta avataani najugaqartumit aqunneqarpat, suliffeqarfik akileraarutinik nutaanik akiliisussanngortinneqassammat.

Suliffeqarfiit tunineqarnerannut nalorninartorsiortitsissasoq

- Siunnersuut nalorninartoqartipparput. Tassami akileraarutissatut nutaatut nunani allani ilisimaneqanngitsutut isikkoqarunarpoq.

Kinguaariit nikinnerinut suliffeqarfiillu tunineqarneranni nalorninartorsiortitsivoq, tamannalu nunanit allanit Kalaallit Nunaannut aningaasaliissuteqartoqarnissaanik ajornannginnerulersitsinavianngilaq, aningaaseriviup pisortaa Martin B. Kviesgaard Sermitsiamut oqarpoq.

Ukiakkut ataatsimiinnermi inatsisissatut siunnersuutigineqassasoq

Inatsisartut ukiakkut ataatsimiinneranni Aningaasaqarnermut Akileraartarnermullu naalakkersuisoq Múte B. Egede isertitat akileraarusersorneqartarnerat pillugu Inatsisartut inatsisaata allanngortinneqarnissaanik inatsisissatut siunnersuut saqqummiutissavaa.

Taassuma Naalakkersuisoqarfia Sermitsiamut taama ilisimatitsivoq.

Nunatsinni sanaartugassanik suliakkerneqartartoq angisooq Permagreen, eqqartuussissuserisut suliffeqarfiat Arctic Law Greenland aamma Sulisitsisut inatsisissatut siunnersuut piviusunngortinneqassappat, Nunatsinni suliffiit, isertitat, aningaasaliinerit ineriartornerlu annaaneqarsinnaanerat mianersoqqussutigisimavaat.

Aningaaserivik: Aningaasanik nuunnermi akileraarut akueraat

Inatsissatut siunnersuutip pingaarnersaa tassaavoq paragraf 38, tassa suliffeqarfiit Nunatsinnit nuuttut nuunnerminni akileraaruserneqartarnissaat. Aningaaseriviup inatsisissatut siunnersuut tamakkerlugu akerlerinngilaa, taamali akileraarusiiniarneq akueralugu.

Akileraartarnermi aallaavigineqartoq tassaavoq, ingerlatseqatigiiffiit niuernerminni isertitassatut naatsorsuutigisaasa nalingat aallaavigalugu akileraartussaanerat. Tassa nuunnermi akileraarummik aamma taaneqartartoq.

Inatsisissatut siunnersuutip paragraf 38-ata immikkoortuani 3-mi allassimavoq, ingerlatseqatigiiffiit Nunatsinnit nuuttut ullormit nuuffigisaminnit akileraaruserneqartussaanerat. Tassa nuunnermi akileraarutigineqartartoq, aamma nunamut allamut nuunnermi akileraarummik taaneqartartoq.

Tusarniaanermi akissut: - Nalaatsornerinnakkut akileraartarneq

Namminersornerullutik Oqartussanit oqaatigineqartut naapertorlugit tamanna pissuteqarpoq, ingerlatseqatigiiffiup akileraartarfia nuunneqarpat, pigisat nalillit nunamit anninneqassammata aningaasaatigineqartut/pigisat nalillit akileraaruserneqanngitsut. Taamaattumillu aamma nuunnermut akileraarutit akilerneqartussaapput aqutsisut nunamut allamut nuukkaangata. Tamannalu Grønlandsbankenip, inuussutissarsiortunik sullitaqarluartup, nuannarinngilaa.

- Ingammik ingerlatseqatigiiffiit angisuut pilersaarutaanngitsumik aqutsisuminnik taarsiigaangata, piffissami sivikitsumi pisortamik toqqaanissamik tungaanut Kalaallit Nunaanni najugaqanngitsumik ingerlatseqatigiiffimmik ingerlatitseqqissinnaanissaq pisariaqartittarpaat.

- Tamanna ingerlatseqatigiiffiup Kalaallit Nunaanni ingerlatsineranut allannguinngilaq. Tamatumani avammut nuunnermi akileraartarnissaq oqimaallunilu nalaatsornerinnaassaaq, ingerlatseqatigiiffiullu Kalaallit Nunaanni ingerlaannarnissaanik siunertamut attuumassuteqanngilluinnarluni, Grønlandsbankenip tusarniaanermut akissutaani allassimavoq.

Eqqartuussissuserisoq: Amerlasuunik akileraarneq

Arctic Law-imi pisortamit eqqartuussissuserisumit Britta Keldsenimit oqaatigineqartut naapertorlugit piginneqatigiiffiit aktieselskabillu immikkut akileraartussanngortinneqariaannaapput. Assersuutigalugu pisortaq Nunatsinnit Danmarkimut nuuppat.

Akileraarut taamaalilluni suliffeqarfiit Nunatsinni kommunimi inuttunerpaami Kommuneqarfik Sermersuumiittut namminneq aningaasaataasa ileqqaakkaminnilluunniit sinneqartoorutaasa 17 procenterissavaat.

Suliffeqarfiit ingerlatseqatigiiffittut 30 procentimik akileraartareerput. Aktiaatileqatigiiffiillu aamma piginneqatigiit iluanaarutiminnut akileraartussaatitaapput, kommunimi akileraarummut naapertuuttumik.

Suliffeqarfik nuukkallarneqaraluarpat nuuinneqaraluarpalluunniit aamma Nunatsinni ingerlatsiinnaraluarpalluunniit, akileraarutissaq nutaaq 17 procentiusoq akilerneqassaaq.

Suliffeqarfimmi pisortaasoq napparsimanermigut ilinniagaqarnermilluunniit pissuteqartumik Danmarkimut nuukkallartariaqalerpat, siunnersuut naapertorlugu Britta Keldsenip angisuumik akileraarusersuinertut taasaatut akileraarutit qaffasissuupput.

Naalakkersuisut siunnersuutaat suliffeqarfinni aalajangersimasuni sinneqartoorutit namminerlu aningaasaatit 17-19 procentiinik akileraaruserneqarnissaat Arctic Lawimit, Permagreenimit Sulisitsisunillu sakkortuumik naammagittaalliuutigineqarpoq.

- Tamanna suliffeqarfiit matuneqarnerannik kinguneqarsinnaavoq, taamaalillunilu Kalaallit Nunaat isertitassaminik suliffissanillu annaasaqarsinnaalluni, Arctic Law-imeersoq Britta Keldsen siusinnerusukkut qaammammi matumani Sermitsiamut oqarpoq.

Suliffeqarfiit kommunimi sorlermi inissisimanerat apeqqutaatillugu akileraarutit assigiinngitsuussapput.