Inuussutissarsiummik ingerlataqarnermut inatsisissaq isumaliutigissagaat
Naalakkersuisut inatsisissatut siunnersuutaata najugaqartussaatitaanermik atorunnaarsitsiviusup pitsaaqutai aqjoqutaalu Inatsisartut Inuussutissarsiornermut Ataatsimiititaliaannit qanimut misissorneqassapput
Kalaallit Nunaanni najugaqanngikkaluarluni assersuutigalugu aatsitassarsiornerup iluani suliffeqarfimmik ingerlatsisoqarsinnaassava? Inuussutissarsiummik ingerlatsinermut inatsisissatut Naalakkersuisut siunnersuutaat Inatsisartuni Inuussutissarsiornermut Ataatsimiititaliamit suliarineqalerpat apeqqut taanna qitiutinneqartunut ilaassaaq.
Siunnersuut ataasinngormat siullermeerneqarmat Inatsisartunit ataatsimiititaliami oqaluuserineqartussanngorlugu ingerlateqqinneqarpoq.
Inuussutissarsiutitigut suliniutinut angisuunut soorlu uuliasiorluni qillerinernut, aatsitassarsiorfiliornernut suliffissuarnillu sanaartornermut sinaakkutissat pineqartillugu inatsisinut ataatsimoortunut Inatsisartunit isummerfigineqartussanut inatsimmut allannguutissaq ilaavoq. Inatsisissatullu siunnersuut malittarisassat pisariillisarneqarnissaannik unammilleqatigiinnerullu siuarsaavigineqarnissaanik ilaatigut siunertaqarpoq.
Misissuisoqarnissaa kissaatigigaat
Siunnersuummi inuussutissarsiummik ingerlataqarnermut inatsisip - suliffeqarfimmik qanoq ingerlatsisoqarnissaanut malittarisassanik aalajangersaaviusup - atuisartunut inuinnarnut nioqqutissanik nioqquteqarnermut killeqartitaalerneranik isumaqassaaq.
– Inuussutissarsiummik ingerlataqarnermut inatsisip nutarterneqarnissaata pisariaqarnera isumaqatigiissutigaarput, kisianni najugaqartussaatitaanerup atorunnaarsinneqarnerata kingunissaanik iternga tikillugu misissuisoqarnissaa kissaatigaarput, taamatuttaarlu inatsisip pisiniarfinnuinnaq tunngatinneqalernissaata kingunissaanik qulaajaasitsiumalluta, Inuit Ataqatigiinni oqaaseqartoq Naaja Nathanielseni inatsisissatut siunnersuutip siullermeerneqarneranut atatillugu oqaaseqarpoq.