Ironbark milliardinik taarsigassarsitinneqarnissamut neriorsorneqarsimasoq
Aatsitassarsiutileqatigiiffik 657 millioner dollarsit - tassa 4,3 milliarder koruunit angullugit taarsigassarsitinneqarnissamut Amerikami aningaasaliissuteqartarfimmit US Exim-imit neriorsorneqarsimavoq. Aningaasat taakkua piumasaqaatit arlallit naammassineqarsinnaassappata aatsitassarsiornermut tamarmiusumut aningaasaliissutaasinnaapput.
Ukiup ataatsip matuma siornatigut saqqummiunneqarpoq, USA-mi aningaasaliissuteqartarfik US Exim (Export–Import Bank of the United States) Ironbarkip Tunup Avannaarsuani aatsitassarsiorniarneranut soqutiginnittoq. Aatsitassarsiorfimmi zinkimik piiaanissaq pilersaarutaavoq .
Siorna aningaasat 1,4 milliarder koruunit taarsigassarsiaritinneqarnissaat siunertaasimagaluarpoq. Aningaasat taakku maanna annertuumik qaffanneqarsimapput.
Ironbankip Australiameersup nalunaaruteqarluni ilisimatitsissutigaa, US Exim suli soqutiginnittoq, aamma aningaaserivimmit pilersaarusiortoqarallarsimasoq, tassani aningaaserivik 657 millioner dollarsit - tassa 4,3 milliarder koruunit angullugit taarsigassarsisitsinissamut pisussaaffeqarluni neriorsuisimalluni.
Taarsigassarsisitsinissamik neriorsuisimaneq suli pituttuisuunngilaq, Ironbarkilli aamma suliniutip piumasaqaatit arlallit qaammatini aggersuni misissorneqartussat naammassisinnaassappatikkit, aatsitassarsiorniarneq tamakkerlugu US Eximi-imit aningaasaliiffigineqarsinnaassaaq.
Ingerlatseqatigiiffimmit nalunaarut naapertorlugu, taarsigassarsiarititassatut neriorsuutigineqarsimasut marlunngorlugit avinneqassapput. Affai 'Amerikamiut aningaasartuutissaannut' affaasalu aappai najukkami aningaasartuutissanut. Tassa 485 millioner dollarsit Amerikamiut aningaasartuutissaannut 171 millioner dollarsillu najukkami aningaasartuutigineqartussanut immikkoortineqarsimapput.
- Suleqatitsialassuaq
Ironbarkimi pisortaanerup Michael Jardinep oqaatigaa, Citornen Fjorderimi suliniummut tamanna pingaarutilimmik alloriarfiussasoq:
- Siunissami US Exim-iunngitsumik pitsaanerusumik suleqatissaqanngilagut. Aningaaserivik qaammatini aqqaneq-marlunni tulliuttuni suliassanik ingerlatsilerutta Ironbarkimut Ironbarkimullu soqutiginnittunut suleqatitsialassuussasoq.
- Aningaasaliissuteqartarfissuarmit soqutiginnittoqarneratigut Citronenimi suliniut zinkimik piiaaffissatsialattut akuerineqarpoq, Citronenimilu zinkimik tunisassiornissap qanilliartornerani periarfissaqarluartutut uppernarsarneqarluni.
Pisortaq isumaqarpoq, qaammatit arfinillit kingulliit ingerlaneranni suliniummut iluaqutaasussamik nikittoqarsimasoq, taassumalu naatsorsuutiginerarpaa, suliffeqarfiup 2022-p ukiuata affaani siullermi suliuniummut aningaasaliissuteqarnissaq inississimassagaa.