Issittoq aatsitassanik ulikkaarpoq – kineserit utaqqiinnarput
Sermip sikullu aakkiartornerat ilutigalugu qillerussuit assaassuillu atorlugit uuliamik, kuultimik ujaqqanillu erlinnartuutaasivik ammarneqarsinnaavoq
Kuulti, savimineq, kanngussak, zinki, rubinit, uulia, pinngortitap gassia nunallu sananeqaatai qaqutigoortut.
Issittup sikueriartornera ilutigalugu Issittumit tamarmit pisuussuterpassuit saqqummeralissapput. Svalbardimit Kalaallit Nunaannut, Canadap issittortaanit Alaskamut Sibiriamullu.
Norskit uuliasioqatigiiffiat Statoil Svalbardip kangiata imartaani uuliasiorluni qillerinissaq pillugu Ruslandimut ullualuit matuma isumaqatigiissusiorpoq.
Pinngortitap gassia Sibiriameersoq aqqutigalugu Europap kitaanik siunissami nukissiuuteqarnikkut pilersuinerup ilarujussua russinit annaanniarneqalereerpoq, uulialu Sibiriameersoq aqqutigalugu Rusland nunarsuarmi uuliamik tunisassiortut annerpaartaannut ilaalereersimalluni.
Amerikamiut Alaska uuliamik annertuumik aamma qalluipput.
Canadamiut aatsitassarsiorfeqarnerup iluani nunarsuarmi siuttut akornanniipput, ilaatigut Canadap issittortaani kuultimik, uranimik, diamantinik, kanngussammik aluminiumillu qalluinermik misilittagaqarluarnertik pissutigalugu.
Milliarderpassuit
Naluneqanngitsutulli aningaasarsiornerujussuaq aamma maani Kalaallit Nunaanni aallartissinnaavoq.
Kalaallit Nunaata nunataata naqqani uuliap ilisimatuunit ilimagineqartutut nassaassaasup 4 procentiinnaaluunniit qallorneqarsinnaappat Aatsitassanut Ikummatissanut Pisortaqarfimmi pisortaq Jørgen T. Hammeken-Holm naapertorlugu tamanna Kalaallit Nunaata karsiata imassaaleqisup 300 milliarder koruuninik pissarsissutigissagaluaraa, Morgenavisen Jyllands-Posten allappoq.
Læs også "Kinesere er klar med milliarder"
Tamatuma peqatigisaani nunarsuarmi pissaanilissuit nutaartaat, Kina, siunissami isumalluutini ujaasinermut pingaaruteqarneruleraluttuinnarpoq.
Tuluit aatsitassarsioqatigiiffiat London Mining, Kinamiunik suleqatinik aningaasaatilinnillu tunuliaqutaqartoq, Nuup kangiani Isukasiani saviminissarsiorfimmut 12 milliarder koruuninik aningaasaliinissamut piareersimavoq.