Issittoq Københavnimi
Uani sapaatip akunnerani EU kommissioni, uuliamik gassimillu soqutigisalli naalakkersunikkullu nuimasut Issittoq pillugu oqaluuserisaqassapput
Uani sapaatip akunnerani Københavnimi Issittoq kinnunnit tamanit eqqartorneqassaaq. Ilisimatuut, uuliasiortut gassimillu soqutigisaqartut naalakkersuinermilu suliaqartut uani sapaatip akunneranik Issittoq pillugu oqalugiarfigineqassapput.
Ullumi aqagulu nunatsuarmi tamarmik uuliasiornermik gassimillu piiaanermik suliaqartut SAS Radissonimi Københavnimiittumik ataatsimeersuassapput qulequtaqartumik ”Greenland and Barents Sea”, Kalaallit Nunaat Barentillu imartaa. Tassani Nunaoilip pisortaa Hans Kristian Olsen ilaatigut oqalugiarssaaq.
-2012-mi nunatsinni neqeroortitsinissaq tulliat Barentillu imartaata killeqarfii pillugit Ruslandimik Norgemillu isumaqatigiissuteqarnissaq ulluni tullerni ataatsimeersuarnermi annertuumik sammineqassapput, ataatsimeersuarnermi aaqqissuisut allapput.
Aqagu marsip 13-ni DTU-p ingerlatsivia Polar Activities Lyngbymiittoq ilisimatusarnermi ataatsimeersuarmi qitiussaaq, ”Space and the Arctic´12” avataarsualiartarneq eqqartorneqarluni, EU kommissioni, qallunaat ilisimatusarnermut ministereqarfia Europamilu avataarsualiornermut suliniaqatigiiffiup aaqqissugaanik.
Ataatsimeersuarneq tassaavoq 2009-mi Stockholmimi siullermik ”Space and the Arctic” qulequtaralugu ataatsimeersuarnerup malittaa.
Tallimanngorpat naalakkersuinermik suliallit nunanut allanut ministeri Villy Søvndal siuttoralugu Issittoq pillugu ataatsimeersuassapput. Nunanut allanut ministerip saniatigut tusaamasat allat aamma peqataassapput ataatsimeersuarnermi Københavns Universitetip inersuaani 450-nut inissaqartumi ingerlanneqartumi. Verdensnaturfonden aaqqissuisuuvoq WWF'imi allattaaneq Danmarkimeersoq Gitte Seeberg siuttoralugu.
ICC´mit Aqqaluk Lynge, tusagassiortoq atuakkiortorlu Martin Breum, ilisimatooq Katherine Richardson, ilisimatooq Mikkel Vedby Rasmussen aamma Verdensnaturfondenip silap pissusaanut avatangiisinullu pisortaa John Nordbo akunnerit pingasut ingerlaneranni oqaaseqassapput, aammalu oqallittoqassalluni Gitte Seeberg aqutsisoralugu.
Verdensnaturfonden nalunaarpoq ataatsimeersuarneq matusariaqarsimasoq peqataaniartut 500 sinnermatigit.