ISUMA: Juullimut akissarsiat oqallisigineqanngillat
Juullertinnagu akissarsinissamik isumaqatigiisutip inernera oqallisigineqanngilluinnarpoq, SIK'p siulittaasua Jess G. Berthelsen isummersuummi uani allappoq
Tupaallaqaanga tallimanngormat atuarakku Aningaasaqarnermut Naalakkersuisoqarfiup tusagassiuutinut nalunaarutaa – issuaaneq – SIK kattuffiillu IMAK, AK, PIP aamma PPK Naalakkersuisunut isumaqatigiissuteqartut decemberimi akissarsiassat siunissami decemberip naalernerani tunniunneqartassasut, saniatigullu isumaqatigiissitsiniartartumut suliassiissut tunuartinneqartoq. Tassunga taarsiullugu Naalakkersuisut akuersipput 2011-mi decemberimi akissarsiassat juullertinnagu tunniunneqassasut – issuaaneq naavoq.
Juullimut akissarsinissamik suliaq Naalakkersuisut avammut nalunaarutaanninngarnit allaanerujussuarmik ingerlanneqarpoq. Novemberi naalersoq ataatsimeeqatigiinnermit siullermiilli, taamani akerliulluni atsiornerit 1800-t SIK-p Aningaasaqarnermut Naalakkersuisumut Maliina Abelsenimut tunniummagilli, Naalakkersuisup erseqqissareerpaa ukiormanna decemberimi akissarsiassat juullertinnagu tunniunneqarnavianngitsut.
Oqaluuserisariaqanngilarluunniit, SIK Maliina Abelsenimit taama erseqqitsigisumik oqarfigineqarpoq. Tamanna tunngavigalugu kattuffiit taaneqartut isumaqatigiissitsiniartartumut suliassiipput. Suliap ingerlanerani ajoraluartumik paasivarput isumaqatigiinngissutip inernissaa siumut aalajangern
- issuaaneq – juullertinnagu akissarsinissaq immikkut aningaasartuutaassaaq – issuaaneq naavoq – suliap ingerlaqqinnerani Maliina Abelsen tunngavilersuivoq, naak SIK-p siulersuisuunerisa tamarmiullutik siunnersuutigigaluaraat juullertinnagu aningaasarsinissamut ernianut aningaasartuutaanerusut affat akilerniarlugit. Tassanissaaq akissut tassaavoq NAAGGA!
Suliap inernera tamatta maanna ilisimalereeratsigu inaarutigerusuppara oqarlunga ullumikkut Naalakkersuisoqartugut uagutsinnik pissusiviusut akornanni inuusunik ilinniartitserusuttorujussuarnik suut uagutsinnut qinersisartuusunut pitsaanerunersut, nutaaliunnguaratik neriulersitsisunik tamanut pitsaanerusumik naapertuilluarnerusumillu Nunatsinni inuuneqalernissamik.
Isumaqatiginiakkat siunersioqqaannguarnagit isumaqatigiinnermik tusagassiuutinut nalunaarnerup, misigeqqammisatta, ajoraluartumik asseqanngitsumik takutippaa imminut naammagisimaarneq, makitaniarneq malitassanillu nalinginnaasunik suusupaginninneq.