Isumalioqatigiissitaq nutaaq pilersinneqassasoq
Pisortat suliffeqarfiini sulisut aningaasarsiatigut atorfeqarnermilu atugassarititaannut isumaqatiginninniartarneq, aqukkuminarninngortinniarlugu aaqqissuuteqqinneqassaaq. Naalakkersuisut tamanna tunngavigalu aalajangersimapput, isumalioqatigiissitamik nutaamik pilersitsiniarlutik.
Allatut isumaqatiginninniartarnissamut isumalioqatigiissitassaq piariingajalerpoq, ilaasortassallu toqqarneqarnissaannut piffissaq sivisooq ingerlassangunanngilaq. Allattoqarfimmi pisortassaq maajip allaqqaataani atorfinitsinneqarpoq, tamatuma kingorna isumalioqatigiissitsami ilaasortat 13-it sulillutik aallartinnissat naatsorsuutigineqarpoq.
Anguniakkat annertuut
Aaqqissuussinissaq ajornaannerujussuarmillu isumaqatiginninniartarnissa pillugit anguniakkat annertoorujussuupput.
Nammiersorlutik Oqartussat ullumikkut 24-nik tunngaviusunik isumaqatigiissuteqarput, sulisut kattuffiinut 87-inik isumaqatigiissuteqarput, tassa pisortani sulisut 10.699-it sinnerlugit isumaqatigiissuteqarput.
Pilersaarutaavoq isumaqatigiissuterpassuit aaqqissuunneqarnissaat:
pisortat suliffeqarfiini sulisunut tamanut atuuttussamik tunngaviusumik isumaqatigiissummik ataatsimik ikittunnguanilluunniit peqarnissaq anguniarneqarpoq
Namminersorlutik Oqartussat sulisullu kattuffiisa tunngaviusumik isumaqatiginninniarneranni, inuiaqatigiit aningaasaqarnerat aningaasarsiatigullu kisitsisitigut paasissutissat pillugit erseqqissumik allaatigisat tunngavigineqartassasut
isumaqatiginninniariaatsit ajornaallisarneqassasut.
Ulumikkut isumaqatiginninniartarnerup sukkanerusumik naammassineqartarnissaa anguniagaavoq.
Najukkami pissutsinut naleqqussaasarnissaq
Aamma erseqqissaassutigineqarpoq, maannakkut isumaqatiginninniariaaseq, aningaasarsiat najukkami sulinermi pissutsinut naleqqussarniarlugit eqaannerujussuarmik ingerlanneqartalertariaqartoq.
Aamma akunnermiliuttarneq isumaqatigiissitsiniartarnerlu pitsaanerpaamik ingerlanngillat. Anguniagaavoq isumaqatigiissitsiniartarnerpassuit ikilisinneqarnissaat, Namminersorlutik Oqartussanut sulisullu kattufiinnut piffissamik annertuumik atuisitsisarmata.
Isumalioqatigiissitassaq maannakkorpiaq aappassaanik naggataamillu tusarniaassutigineqarpoq, immikkuualuttut annikitsunnguit iluarsiiffigineqarnissaat naatsorsuutigineqarluni. Naalakkersuisut politikikkut aalajangersimapput isumalioqatigiissitamik pilersitsisoqassasoq, inuttaralugit siulittaasoq Naalakkersuisunit toqqagaasoq kiisalu ilaasortat arfinillit sulisut kattuffiineersut, ilaasortallu arfinillit Namminersorlutik Oqratussaneersuullutillu kommunineersut.
Piffissaliussaq
Pisortat isumaqatiginninniariaasiata ajornaallisarneqarnissaanik isumassarsiaq, Siumut, Atassutip Nunattalu Qitornaasa 2018-imi oktoberip qaammataani naalakkesuisooqatigiinnisamik isumaqatigiissutaannit tunngaveqarpoq, Naalakkersuinikkullu Ataqatigiissaarisoqatigiit isumalioqatigiissitamik taama ittumik aallartitsisoqarnissaanik pilersaarummut 2019-imi jauaarip qaammataani ilanngupput.
Piffisaliussaq naapertorlugu isumaliutissiissut 2021-mi septemberip qaammataani Naalakkersuisunut saqqummiunneqassaaq. 2020-mut Aningaasanut Inatsit naapertorlugu, isumalioqatigiissitap sulinissaanut 2020-mut 2021-mullu 1,5 millioner koruunit immikkoortinneqarsimapput. Kommunit aningaasat taakku annertoqqataannik aamma tunniussissapput.
Sulisut kattuffii 20-t ammann ilaasortassanik arfinilinnik toqqaassapput. Kattuffiit pineqartut ilaat tassapput: ilinniartitsisut kattuffiat IMAK, SIK, AK, peqqinnissaqarfimmi sulisut kattuffiat PPK, perorsaasut kattuffiat NPK aamma ilinniagartuut kattuffiat ASG.