Isumaqatigiissitsiniarnermi suliaq: Uranip inerteqqutaalerneranut tunngavilersuutit ataatsimiititaliap qaqilerusukkai
Uranimut inatsisip allanngortinneqarnerani kingunissat taarsiisitsiniartoqarnissaanullu aarlerinaat pillugit Inatsisartut tamakkiisumik paasitinneqarsimanersut pillugu misissuisitsinermik aallartitsisoqarnissaa Inatsisartuni kukkunersiuinermik ataatsimiititaliap kissaatigaa.
Energy Transition Mineralsip (ETM) aamma Kalaallit Nunaat/Danmarkillu akornanni isumaqatigiissitsiniarnerannut suliamut tunngatillugu politikkikkut nutaamik iliuuseqartoqarpoq.
Nunatta karsiata naatsorsuutai 2022-moortut kukkunersiorneqarnerannut atatillugu Kukkunersiuinermut ataatsimiititaliap kissaatigaa uranimut naaggaarluinnarnerup 2021-mi atuutsilerseqqinneqarsimaneranut tunngasut qaqilerneqassasut.
Uranimut naaggaarluinnarnerup atuutilerseqqinneqarnera ETM-ip 76 mia. kr.-nik taarsiititseqquneranut tunngaviulluinnarpoq.
Nunatta karsiata naatsorsuutaanik Kukkunersiuinermut ataatsimiititaliap suliaqarnerminut atatillugu Inuussutissarsiornermut, Niuernermut, Aatsitassanut, Inatsisinik Atuutsitsinermut Naligiissitaanermullu Naalakkersuisumik - isumaqatigiissitsiniarnermut suliamut tunngatillugu - sapaatip akunnerata siuliani siunersiuivoq.
Paasissutissat tamarnik Inatsisartunut tunniunneqarsimappat?
Kukkunersiuinermut ataatsimiititaliap siunersiuinermini akissutiserusussimavaa Inatsisartut inatsimmut tunngasunik paasissutissanik tamakkiisunik pisimanatik, soorlu uranimut inatsisissap kingunissaanut tunngasuni, suliaqartitaasimanersut.
Kukkunersiuinermut ataatsimiititaliaq siunersiuinerup kingorna, 11. november isumaliutissiissutimini allappoq ataatsimiititaliap kissaatigigaa suliami suli qaqilerisoqassasoq:
- Aatsitassat naavianaatilinnik misissueqqaarniarluni qinnuteqartoqaqqaarneranit 2022- mi suliassanngortitsinerup tungaanut uranimut politikkip ingerlanneqartup qulaajarneqarnissaa Kukkunersiuinermut Ataatsimiititaliamit kissaatigineqarpoq. Qulaajaanermi aalajangiinerit atortussallu aalajangiinermut tunngaviusimasut tamarmik ilanngunneqassapput.
- Tamatumani immikkut qitiutinneqassaaq Inatsisartut uran pillugu inatsimmik 2021-mi ukiakkut suliarinninnerat akuersissutiginninnerallu sioqqullugu uranimut inatsisip kingunerisassai aammalu Namminersorlutik Oqartussat taarsiissuteqarnissamut pisussaaffilerniarneqarsinnaanerisa aarleqqutigineqarsinnaanera pillugit paasissutissat attuumassutillit tamarmiusut Inatsisartunit pigineqarsimanersut.
Kukkunersiuinermut ataatsimiititaliap kissaatigaa misissuinissamut kissaateqarneq Inatsisartuni ullumi suliarineqassasoq.