Isumaqatigiissut nutaaq naammagineqanngitsoq

Namminersorlutik Oqartussat atorfillillu kattuffiat AK ukiuni tallimani atuuttussamik isumaqatigiissuteqarput, Nunatsinnili Inunnik Isumaginninnermi Siunnersortitut Ilinniarsimasut Peqatigiiffiata ilaasortani isumaqatigiissummut naaggaaqqullugit kajumissaarpai.

AK-p ataani sulisartut amerlanerusut akissarsiaat qaffanneqassapput.

Akissarsiat pitsanngoriaatissaat katillutik 9,53 pct.-iupput, tunngaviusumillu akissarsiat qaffaataannut, erninermut atatillugu sulinngiffeqartarnerup pitsanngorsaavigineqarneranut, soraarninngornermi atugassarititaasunik pitsanngorsaanermut tapeqartitsisarnerullu pisariillisarneranut agguataagaallutik.

Suliaqarfiit uku isumaqatigiissummut ilaapput

Isumaqatigiissut funktionsoverenskomstimi siusinnerusukkut atuuttumi pineqartunut tamanut, inunnik isumaginninnermi siunnersortinut sullissisunullu, nakorsat allattaannut kiisalu Isumaqatigiissummi Kigutip iluani pineqartut klinikassistentinut, kigutigissaasunut kiisalu tandteknikerinut Namminersorlutik Oqartussani, kommunini taakkualuunniit ingerlatsiviini atorfeqartunut atuuppoq.

Tusarfik: AK

Isumaqatigiissut nutaaq maanna ilaasortanit taasissutigineqartussanngortoq kiisalu Naalakkersuisunit akuerineqartussaq pillugu Atorfillit Kattuffiat (AK) taama allappoq.

Isumaqatigiissut nutaaq 2023-mi apriilip aallaqqaataanit kingumoortumik atuutilertussaasoq ukiunilu tallimani atuutissasoq AK-p paasissutissiissutigaa.

Isumaqatigiissutip akuerineqarneranit atuutilersinneqarneranillu ulloq taanna aallarnerfigalugu ilaasortat akissarsiaat kingumoortumik nalimmassarneqassapput.

AK naapertorlugu soraarnerussutisiassat assigiissuunissaat isumaqatigiinniarnermi anguneqarpoq, taamaalillutik sulisut isumaqatigiissummi pineqartut tamarmik sulisitsisup akiligaanik soraarnerussutisiassanut 10 procentimik tunineqassallutik, kiisalu nammineq akiliutissaq 5 procentiulluni.

Inunnik isumaginninnermi siunnersortit naammaginninngitsut

Isumaqatiginninniarnerit suli ingerlanerini Nunatsinni Isumaginninnermi Siunnersortitut Ilinniarsimasut peqatigiiffiat akerliussutsimik takutitsinissamut qaaqqusissimalluni nalunaarpoq, suliartoqquneqariatarsinnaanermut tapiissutit peerneqarnissaat isumaliutersuutigineqarsimammat.

Tapit arlaqartut ataatsimut katinneqartut tapinut tunngatillugu AK allappoq, taamaalillutik sulisut ataasiakkaat qaammatini pingasuni nalunaaquttat akunnerini 37-ini 52-iniluunniit suliartoqquneqaratarsinnaanermut pisussaaffeqassallutik.

Suliartoqquneqaratarsinnaanermut tunngatillugu ilaasortat atugaat ajornerulersimasut, isumaginninnermi siunnersortit peqatigiiffiat NIISIP isumaqarpoq.

- Taamaattumik ilaasortavut ullumimit pigaartuusarunnaaqqullugit sulinermilu saniatigut sulisarunnaaqqullugit kaammattuutigaarput. Kikkut allat unnukkoorlutillu unnuarsiussagamik tiimimut 40 koruuniinnaqarlutik. Aatsaat qaammatit pingasut ingerlanerini 52 tiiminik qaangiuttoorsimagaanni aningaasanngorlugit tiguneqarsinnaassallutik, tusagassiuutinut nalunaarummi siulersuisoq Martha Lund Olsen allappoq.

Tamanna tunngavigalugu isumaqatigiissummut nutaamut NIISIP-ip ilaasortani naaggaaqqullugit kajumissaarai, taanna Sermitsiamut itisiliivoq.

Powered by Labrador CMS