isumaqatigiissutip ajoqutaanissaa aarleqqutigaat
Sulisitsisut Peqatigiiffiat GA, SIK aamma Nusuka ataatsimoortumik oqaaseqaateqarlutik Kyotomi isumaqatigiissutip nutarterneqarnissaa apeqquserpaat.
Sulisitsisut Peqatigiiffiat, SIK aamma Nusuka, avatangiisinut naalakkersuisumut allapput Kyotomi isumaqatigiissut naapertorlugu CO2-mik mingutsitsinerup annikillisarnissaa piviusunngortinniarneqassappat, Kalaallit Nunaanni aatsitassarsiornikkut ineriartorneq unitsinneqassasoq, allallu suliffeqarfiit nukissiornermik pisariaqartitsisut, soorlu aalisarnerup innarlerneqarnissaa oqaatigalugu, knr.gl allappoq.
Nunat tamat mingutsitsinnginnissaq anguniarlugu isumaqatigigaluarlugit, Kyotomi isumaqatigiissut naapertorlugu ingerlasoqaleraluarpat annilaanngatigaat suliffissuaqarneq innarlerneqassasoq, aningaasatigullu Kalaallit Nunaata imminut nappassinnaalernissaa artornarnerulersinneqassasoq.
Silap allanngoriartornera pillugu FN-ip aappaagu decembarimi Københavnimi ataatsimeersuartitsinissaani Kalaallit Nunaata immikkut piumasaqaatigiumaagassaasa tusaaniarneqarluarnissaat naalakkersuisumut allagaqartut qulakkeerusuppaat.
- Taamaassappat aatsaat Kyotomi isumaqatigiissummik atsioqataanissarput innersuussutigisinnaavarput, Sulisitsisut Peqatigiiffiannit Henrik Leth, SIK-mit Jess G. Berthelsen Nusukamiillu, Gerth B. Lynge allapput.