Job i mineselskab
Jens B. nassuiaateqarniarpoq
Demokraatit siulittaasuata partiip siulersuisuuneri ataatsimiigiaqquvai - tamanna pivoq True North Gems Greenlandimi atorfinitsitaanerata isornartorsiorneqaqisup kingorna
Demokraatit siulittaasuat Jens B. Frederiksen isornartorsiorneqartorujussuuvoq saqqummiunneqarmalli politikeri nuimasooq aatsitassarsioqatigiiffimmi True North Gems Greenland-imi, Qeqertarsuatsiaat eqqaani rubininik piiaanissamut akuersissummik piniartumi, atorfinitsitaasimasoq. Maannalu tamanna ingasagilerpaa.
Aamma atuaruk: Atassut: Jens B. - politikki inuussutissarsiulluunniit toqqaruk
– Tusagassiorfinnit sammineqarnerujussua pissutigalugu aalajangerpunga partiip siulersuisuuneri marlunngormat unnukkut ataatsimiigiaqqullugit. Tassani True North Gems Greenlandimi atorfinitsitaaninnut pissutsit paasissutissiissutigissavakka. Siulersuisuunerni ilaasortat arfinillit sinniisaasalu saniatigut nunap immikkoortuani siulittaasut partiillu inuusuttunut immikkoortoqarfiani siulittaasoq peqataassapput. Taamaattumik amerlangaatsiassaagut, Jens B. Frederiksen oqarpoq, taannalu isumaqarpoq isornartorsiuinerujussuaq tunngavissaqanngivissoq.
– Naatsorsuutigisimavara ataasiakkaat kamaammersimallutik bloggertassasut. Ilimagisimanngilluinnarparali atorfinitsitaanera taama aalassatsitsigissasoq. Tassami True North Gems Greenlandimi isumannaatsuunermut akisussaasutut selskabip siumut sammisumik aalajangigaanut sunniuteqarnavianngilanga. Ingasappallaaqaarlu Atassutip tusagassiorfinnut nalunaarutikkut pasillermanga True North Gems Greenlandimit pisiarineqarsimasutut, Jens B. Frederiksen oqarpoq, aternillu taasaqanngikkaluarluni oqadrpoq Inatsisartunut ilaasortat ilaat allat inatsisartut avataanni niunikkut soqutigisaminnik aallussisut.
Jens B. Frederiksen nassuiaavoq soqutigisatigut attuumassuteqarpat qanippallaamik attuumassuteqartutut aalajangeeqataasinnaanngitsutut imminut nalunaarutigisarniarluni, politikkikkut oqaluuserisaqartoqaraangat True North Gems Greenlandimut attuumassutilinnik. Taamaasilluni ajornartorsiutit tamarmik qaangerneqassapput. Aamma isumaqarpoq canadamiut aatsitassarsiornermik selskabiannut attuumassuteqarnini tamaat ammaffigisimallugu.
– Novembarimili partiip inuusuttunut immikkoortoqarfiat oqaluttuuppara True North Gems sinnerlugu siunnersuinernik ingerlatsillunga. Qaammatip tulliani siulersuisuunerit tamatuminnga ilisimatippakka, Jens B. Frederiksen oqarpoq.