Jens K. Lyberth Royal Greenlandimi pisortanngussaaq

Piniarnermut aalisarnermullu Naalakkersuisoqarfimmi pisortaq Jens K. Lyberth aggustip aallaqqaataani Royal Greenlandimi pisortatut atorfimmut nutaamut ikkutissaaq. Royal Greenlandip Kalaallit Nunaanni ingerlatai Jens K. Lyberthip nukittorsassavai.
Royal Greenlandip qullersaqarfimmi sulisuni ukiup ataatsip ingerlanerani 11-nik amerlisimavai. Tamanna pivoq aalisarnermik ingerlatsivissuup Kalaallit Nunaanni ingerlataminik annertusaaneranut atatillugu.
Nunarput sammivaa
– Royal Greenlandimi suleqatinilu aammalu aalisarnermik inuussutissarsiortut, sulisitsisut sulisartullu kattuffii, kommunit Namminersorlutillu Oqartussat suleqatigalugit Royal Greenlandip Kalaallit Nunaanni ingerlatsinera annertusassavaa, Royal Greenland nalunaarpoq.
Jens K. Lyberth aalisarnerup iluani ukiuni 17-ini Danmarkimi, Savalimmiuni Nunatsinnilu sulisimavoq, aammalu Kalaallit Nunaanni Sulisitsisut Peqatigiiffiani suligallarami kattuffiit allat qanimut suleqatigisimallugit.
– Jens Kalaallit Nunaanni aalisarnermik ukiorpassuarni atituumik annertuumillu misilittagaqarpoq, Royal Greenlandillu pisariaqartitaanut suliatigut misilittakkatigullu naleqqulluarluni, pisortaaneq Mikael Thinghuus oqarpoq.
Royal Greenlandip artinik atlantikup avannaaneersunik, Royal Greenlandip Kalaallit Nunaanni aalisagaanik pisiortugaanillu, pilersuinerup sammineqarnissaanut periusiorpoq.