Jern og Metalskolep nuunneqarnissaanut killiffik pillugu susassaqartut paasisaqarusupput
Inuussutissarsiuteqartut, ilinniaqqiffiit Qeqqatalu Kommuniata Jern og Metalskolep Nuummiit Sisimiunut nuunneqarnissaanut pilersaarutit pillugit paasisaqarusupput. Ilinniaqqiffiit ataqatigiinnerulernissaannik kinguneqassaaq, isumaqarput.
Ilinniaqqiffiit arlallit soorlu KTI aamma DTU, aamma inuussutissarsiortut kiisalu Qeqqata Kommuniata Jern og Metalskolep Nuummiit Sisimiunut nuunneqarnissaanut pilersaarutit aallartinneqarnissaat erinitsaatilluinnarpaat.
Jern og Metalskolep Nuummi immikkoortortaqarfia isaterneqartussanngorpoq. Qeqqanilu susassaqartut tamanna ilinniaqqiffiup nuunneqarnissaanut periarfissatsialattut isigaat.
- Inuussutissarsiornikkut ingerlatsineq Kalaallit Nunaanni ilinniarluarsimasut pisariaqartilluarpai, ataatsimoortitsilernerlu ilinniarfinnik ilinniartitaanerup pitsaassusaanik iluarsartuuffigineqarlunilu inuussutissarsionikkut ingerlatsineq nukittorsinneqassaaq. Inassutingaarput Jern & Metal Sisimiunut nuunneqassasoq. Ilimanaateqarluartutummi isigivarput Kalaallit Nunaanni nuttarnikkut iluaqutissartalimmik piffimmut inissittarneq-/nutserneq, pisortatigut suliffissat nuutsinneqatneranut atatillugu, GE-mi immikkoortortami siulittaasoq Knud Oxenvad oqarpoq.
Naalakkersuisut februar 2022-mi nalunaarput Jern & Metalskolep Sisimiunut nuunneqarnissaanut pilersaarutit nanginneqaqqissasut. Pilersaarutilli pillugit suli nalunaaqqittoqaqqissimanngilaq.
Ilinniaqqiffiit ataatsimoortut nukittoqutaassapput
Sisimiuni arktisk ingeniørinngorniat, maskinmesterinngorniat aamma fiskeri teknologinngorniat ilinniartarput kiisalu KTI aamma Sisimiuniilluni. Jern & Metalskole Sisimiunut nuunneqassagaluarpat, ilinniaqqiffiit illoqarfimmeereersut aamma nukittorsarneqarnissaat qularutigineqanngilaq.
- Sisimiut illoqarfittut teknikkikkut ilinniariarfittut ilinniartut misilittagassaannik tunniussaqarluarsinnaavoq, illoqarfittullu inissisimanermigut aamma nukittorsaassalluni, ilinniartitaanikkut qitiusumik Kalaallit Nunaanni inissinnermigut, maskinmesterinngorniarfimmi pisortaasoq Ulrik Bak Nielsen oqarpoq.
Ilinniarfiit assigiinngitsut suleqatigiinnermikkut, imaluunniit ataatsimoortunngornermikkut campus-mik taallugu, angusinnaalluarpaat, suli sunniuteqarluartumik imminnut iluaqutissartamikkut avitseqatigiinnikkut, atorluaaffiginikkullu. Tamannalu periarfissiillualersarpoq siammasinnerusumik ilinniartitsisinnaanngornikkut, ilinniartummi suli sammisassanut-/fag-nut amerlanerusunut, qaffassaqqinnissaminnullu ammaassisarmat. Tamannalu iluaqutaalluartumik sunniuteqarluarsinnaavoq, ilinniarfiillu, inuiaqatigiillu aamma ataatsimut nukittorsarneqalersarmata, Arctic Circle Business, Jern & Metalskolep Sisimiunut nuunneqarnissaanut aamma tapersersuisoq tusagassiorfinnut nalunaaruteqarluni allappoq.
Susassaqartut erseqqissarpaat ilinniaqqiffiup Sisimiunut nuunnissaanut Naalakkersuisut alloriassappata ikiuunnissamut piareersimajumaarlutik.