Jørn Skov Nielsen Greenland Mineralsimiikkunnaartoq
Jørn Skov Nielsen arajutsisitsilluni oktobarimi 2021-mili Greenland Mineralsimiikkunnaarsimavoq. Taamaalilluni aatsitassarsiortitseqatigiiffik piiaanissaminut akuerineqarsimagaluarpat piginneqataassutinik nalituunik pissarsisinnaajunnaarluni.
Greenland Mineralsimi pisortaq Jørn Skov Nielsen ukiaanera tamaat tusarsaasimanngilaq, tamannalu nassuiaatissaqarpoq. Tassami aatsitassarsiortitseqatigiiffiup ukiup sisamararterutaanut nalunaarusiaani allassimavoq, Jørn Skov Nielsen oktobarip 31-anni 2021-mili aatsitassarsioqatigiiffimmi atorfeqarunnaarsimasoq. Aviisi Sermitsiaq allappoq.
Sermitsiap Naalakkersuisut uranimik piiaanissamut inerteqquteqarlutik inatsisiliornerannut atatillugu arlaleriarluni Jørn Skov Nielsen oqaaseqartinniartaraluarpaa, tassami aatsitassarsiortitseqatigiiffiup Kuannersuarni pilersaarutaanut ingerlatitseqqinnissamut tamanna ilungersunartuummat.
Jørn Skov Nielsen Australiamiut aatsitassarsiortitseqatigiiffiannut Greenland Mineralsimut 2020-mi juunimi atorfinippoq, piiaanissamut akuersissuteqarnissamik siunnerfeqarneq siuarsarniarlugu. Tassami Jørn Skov Nielsen Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmi pisortatut atorfeqaraluarami, aamma taanna sioqqullugu Aatsitassanut Ikummatissanullu pisortaqarfimmi pisortaasimasutut inuussutissarsiornermut aatsitassarsiornermullu inatsisinut tunngasunik ilisimasaqarluarami.
Naalakkersuisoqarfimmi atorfimminit aatsitassarsiortitseqatigiiffimmut nuunnera maluginiarneqaqaaq, tassami Jørn Skov Nielsen aatsitassarsiornermut inatsimmik ilusilersueqataasimagami taamalu Nunatsinni atorfilittani qullersat ilaattut paasisimannilluartuugami.