Kalaaleq Spaniami viinninik tuniniaasunngorpoq

Viinnini Spaniameersuni nunatsinni Brugsenimi pisiarisinnaasanni Hammeken Cellars allassimavoq. Puiaasani kiisalu Bag-in-Boxini. Hammeken Hollandimiut aterivaat, nunatsinnili aamma aterineqarpoq, Hammeken Cellarsimilu piginnittortaaq ilaqutariinnit nunatsinneersunit ilisimaneqarluartunit kingoqqisuuvoq.

Nicholas Hammeken, 53-inik ukiulik, palasip Muttip nuliatalu Marithap erngutaraat. Taassuma 25-nik ukioqarluni Hammeken Cellars Spaniap kangiata kitaani Alicantemi 1996-imi 25-nik ukioqarluni naqqaniit aallartippaa. Kingorna karsit ukiumut 1,5 millionit tamarmik viinninik aqqaneq-marlunnik imaqartut nunanut assigiinngitsunut 40-nut ukiumut tunisaramigit ingerlalluangaatsialerpoq.

Aallarteqqaarami kisimiippoq, ullumikkulli sulisut 35-iupput.

Nicholas sulisartuunini tamaat nunani allani Danmarkimilu sulisarsimagaluarluni kalaallinik tunuliaqutaqarnini puigunngilaa.

– Kalaallit Nunaanneersuunera ilisimaareqqissaarpara, affarmillu kalaaliunera tulluusimaarutigaara. Inuit pinngortitami sulisarsimasut maannamullu sulisut nuannaartoralugillu ataqqivakka.

– Pinngortitaq mianersuuttussaagipput ilikkarnikuuara, taamaammallu suliffeqarfiutinni silaannaap pissusia, aningaasaqarneq isumaginninnermullu tunngasut eqqarsaatigalugit akuutissaqanngitsumik piujuartitsisumillu ingerlanissarput anguniakkatta pingaarnerit ilagaat.

- Kalaallimik inuusuttumik sulilersitsinikuuit?

– Naagga, kisianni Hammeken Cellars nunanit assigiinngitsunit aqqaneq-marlunneersunik sulisoqarpoq, taamaammat suminngaanneersuuneq suiaassuserluunniit apeqqutaanngillat. Arnamik Venezuellameersumik ullumikkut pisortaqarlutalu arnamik Spaniameersumik aningaasaqarnermut pisortaqarpugut. Taamaammat arnat ulluinnarni ingerlatsisuupput. Suliffeqarfimmi suliassaminnut pikkorissuunissaat ilaqutariittullu suleqatigiillutik ikioqatigiittarnissaat pingaarneruvoq. Arlaat Kalaallit Nunaanneerluni suleqataarusussaguni tikilluaqqusaangaarpoq.

– Kalaallit inuusuttut piumassuseqarluartut, inuunerminni angusaqarusuttuusut namminersorlunilu inuussutissarsiornermik soqutiginnittuusut malugisarpara. Tamanna siunissaannut iluaqutaavoq, tapersersorusupparalu, Nicholas Hammeken oqarpoq.

Pilersitsiartuaarneq

Nicholas Hammekenimi taava qanoq Spaniami suliffeqarfimmik ingerlalluartumik pilersitsiva?

Inuusuttuullunili viinninik soqutigisaqarami paarnat issorlu mamamut tunngaviliisuusartut pillugit atuangaatsiartarpoq. Ataataminiit ilaquttani viinninik soqutigisaqartuusut isumassarsiorfigisarpai.

Taamaalilluni viinninik ussiisartutut ilinniarami Europami viinniliorfiit assigiinngitsut, soorlu Mosel, Bordeaux aamma Bourgogne ilinniariarfigai. Aamma Tuluit Nunaanniippoq, tassani viinneerniarfimmi ilisimaneqartumi Oddbinsimi sulinermini ullumikkut suliffeqarfimmini ingerlatsinermi atortakkani tamaasa ilikkarpai.

Nicholas 1992-mi Barcelonamut pigami ilaqutariit Spaniamiut viinniliortuusut naapippai, taakkulu tikilluaqqullugulu ernermisut pivaat. Tassani viinnissanik naatitsineq pillugu ilikkagaqangaatsiarlunilu inuppassuarnut attaveqalerpoq.

Nuliani kigutilerisuusoq peqatigalugu Spaniamiusut ilinniarpoq, marluullutillu 1996-imi namminersorlutik Hammeken Cellars Alicantemi aallartippaat.

– Aallarnisaasutut ukiut siulliit sakkortupput. Aalajangersimasumik isertitaqarfiunanilu siunissaq nalorninartoqarpoq. Suliffeqarfik aallartinniarlugu ileqqaakkagut tamaasa atorpagut. Nuliara kigutilerisumi sulilerpoq, sullitaali ataasiinnaammat aningaasarsiorumalluni sullitassarsiortariaqarpoq. Aningaasat tamaasa suliffeqarfimmut atorpagut, taamaammat sipaaqaluta inuugatta naatsiiat uanitsullu kisiisa nerisaraagut. Aningaasakilliorlutalu ullut suliffigut takeqaat, oqaluttuarpoq.

– Suliffeqarfik ataatanniit tunissutisiarigiga arlallit isumaqartarput, nuliarali ikiortigalugu nammineerlunga naqqaniit aallartissimallugu oqaluttuariinnartarpara.

Sipaarlunilu sulingaatsiarnikkut iluatsippoq, 2001-imilu siullermeerluni viinniliorpoq.

Iliuusissatut pilersaarut

- Nammineq viinnissanik naatitsiveqarlutit aallartippit?

–Piffissap ilaani viinnissanik naatitsivinnik attartornissaq paarnallu naatitatta nammineerluta mamassusilernissaat iliuusissatut pilersaarutaajuarnikuuvoq. Spaniamut viinnilioriaasiat nutaaliaasoq naapertorlugu viinniliortarpugut. Taamaammat atuisut suna piumaneraat paasiniarparput. Suli iliuusissatut pilersaarutaavoq. Taamaammat viinniliortarfinnut angalalluta viinnit pitsaanerpaat ujartorlugillu, viinnissanik naatitsiviit attartorlugillu pisisartut mamarisaat malillugit paarnanik allanik akullugu nammineq viinniliorpugut. Sulisut, ilaquttatut isigisama, ilisimasaqarluarlutillu tunniusimasuunissaat pisariaqarpoq.

- Iluatsipporli, 2023-milu viinniliornermik unammisitsinermi viinninik ilisimasalinnik viinnit suminngaanneernerannik siumungaaq ilisimanninngitsunik nalilersuiffiusumi peqataavugut. 25-nik medaljennappugut. Unammisitsinermi ataatsimi taama amerlatigisunik siornatigut medaljennannikuunngisaannarpunga. Tamanna uagutsinnut – uannut sulisunnullu viinninik ilisimasalinnut – eqqortuliorlutalu ajunngitsumik ingerlanitsinnut uppernarsaataavoq. Viinniliortartut allat, unammillertigalugillu suleqatigisatut attaveqatigisamma viinneerniallu ilisimaneqarluartut tamannattaaq uppernarsarpaat.

- Spaniami sumiiffinni assigiinngitsuni 21-ni viinnit pitsaanersiortarpagut, viinnillu pitsaanerpaat pisisartutsinnut tunisassiarinissaat siunertaraarput. Taamatuttaaq viinnissat akuutissaqanngitsumik naatitat pingaartillugillu pinngortitaq silaannaallu pissusia eqqarsaatigalugu piujuartitsineq tunngavigalugu tunisassiarineqartarnissaat pingaartitaraara. Atuisut qanoq ittuuneri suullu piumaneraat paasissallugu pingaaruteqarpoq. Uagutsinnut viinniliuunneq ajorpugut, atuisunulli. Suliffeqarfitsinni pingaarnerpaallunilu ingerlalluarnitsinnut peqqutaavoq, Nicholas Hammeken naqissusiivoq.

Tamannattaaq Hammeken Cellars Spaniami viinniliorfiit 5.500-juusut akornanni ”best export management wine company 2022”-tut, tassa viinneernianut 2022-mi avammut tunisassiullaqqinnerpaatut atuagassiami Mercados del Vino y la Destribuciónimi toqqarneqarmata uppernarsaqqinneqarpoq.

Imminut soraarsippoq

Nicholas Hammekenip ukiut pingasut matuma siorna imminut soraarseriarluni Saile Ramírez Venezuelameersoq pisortaaninngortippaa. Taanna ukiuni 13-inngortuni suliffeqarfimmi atorfeqarami ilisimannilluarpoq. Mari Luz Gilabert Spaniameersoq aningaasaqarnermut pisortaavoq. Nicholas suliitigaluni siulersuisuni siulittaasuullunilu, pilersitsisuullunilu nutaaliornermi pisortatut atsiortuusarpoq. Taamaammat sapaatip-akunnikkaartumik spaniamiusut ingerlanneqartumik ataatsimiittoqartillugu peqataasarpoq, tassani siunissaq pilersaarusiorneqarlunilu kina viinnissanik naatitsivinnik ujaasissanersoq, sumi ujasissanersoq viinnillu sunik akuneqassanersut eqqartorneqartarpoq.

– Oqaatigeriikkattuut atuisut, nunamiit nunamut allanngorartuusut allanngorartuartuusullu, ukkatarineqarput. Siornatigut rødviinniliortartuuvugut – ullumikkulli hvidviinninik roséviinninillu tunisassiornerusarpugut. Atuisut viinnit kimittuut siornatigut piumanerusarpaat – atuisulli maanna rødviinnit kimikinnerumaat piumaneruaat. Taamaalilluta atuisut kissaataat pisariaqartitaallu allanngorartut nalimmassarfigisarpagut, tamannalu pikkoriffigilluinnarparput, oqarpoq. 

Nicholas nunani allani immikkoortortamik 2014-imi ammaavoq, tassani niuerfiit Amerikamiittut ilaatigut tiguarniarsarai.

Suliffeqarfiit allat

Nicholas Hammeken suliffeqarfinnik allanittaaq aallartitsinikuuvoq. Suleqatini marluk peqatigalugit Globus Wines 2006-imi aallarnerpaa, taannalu Brøndbymi maqitsivimmik Bag-in-Boxinik tunisassiortartumik 2007-imi pilersitsivoq. Aallartinnerisa nalaanni tunisassiaq taanna viinninik niuerfinni tunineqartartut 3 procenteraat. Maannali viinninik niuerfinni tunineqartartut 35 procentii Bag-in-Box-iniittuupput. Globus Wine viinninik puiaasanut maqitsisalerluni ineriartorpoq. Nicholas Hammekenip piginneqataassutini ukiut marluk matum siorna tunivai. Tassani Globus Wine Danmarkimi annersaalersimavoq.

Hammeken Cellarsip viinniliorfik 2023mi pisiarigamiuk Bag-in-Boxinik maqitsivinngorlugu allanngortiterpaa, taannalu ateqarpoq Finca Las Piñas. Maqitsivik tiguneqarnermi kingorna marlunnik sulisoqarluni tunisassiortoqarsinnaaniassammat nutarsarneqarlunilu maskiinalersorneqarpoq. Sinnera maskiinanik robotsinillu ingerlanneqartarpoq.

Hammeken Cellars siornatigut Spaniami sumiiffinni assigiinngitsuni sisamani Bag-in-Boxinut maqitsiveqarsimagaluarpoq. Taakku maanna Murciami kattunneqarsimapput.

–Maqitsivimmiit nutaamiit Bag-in-Box viinnit assigiinngitsut Skandinaviamut Europallu avannaanut, ingammik Tysklandimut nunanullu baltiskiusunut kiisalu USA-mut, Canadamut Kangianullu tunisarpagut. Ulapaarfimmi suleqatigiit marlunngorluta paarlattarluta sulisaratta akunnermut viinnit 3 literikkaat 1800-it maqittarlugillu ukioq siulleq syv million literit maqittussaavagut. Tunisassiornerup piujuartitsineq tunngavigalugu akuutissaqanngitsumillu ingerlannissaa suli tassa pingaartitaraarput. Taamaammat tunisassiorneq tamaat seqerngup nukinganik innaallagialersorneqarpoq, Nicholas Hammeken, aammattaaq sumiiffimmi tamarmi tunisassiorneq nukissanik soorlu anorip seqerngullu nukinganik innaallagialersorneqarneranik ilisimatitsisoq, oqaluttuarpoq. Uagutsinnut pingaaruteqarpoq, ilanngussivoq.