Kalaallip igasup ilisimaneqarluartup HX suleqatigileraa

Norskit umiarsuaatileqatigiiffiata HX Expeditionsip, siornatigut Hurtigruteniusup, ilaatigut nunatta Svalbardillu imartaanni aasaanerani angallassisartunik takornariartaatinik umiarsuaatiliusup kalaaleq igasoq ilisimaneqarluartoq Inunnguaq Hegelund suleqatigiinnissamik isumaqatigiissuteqarfigaa.

Illinniartulianik kusanasaakkanik sassaallerneq umiarsuaatileqatigiiffiup HX Expeditionsip umiarsuisa takornariartaassuit ilisimaneqaatiginngilaat. Igasoqatinili nunaqqatigisani igaassat akussallu nunatsinneersut atorlugit kusanasaarlugit ilinnartulianik umiarsuarni taakkunani aasap ingerlanerani ilaatigut nunatta imartaatigoortussani ilaasunut sassaallertarumaarlutik, Inunnguaq Hegelundip oqaatigaa.

Taassumami umiarsuarni takornariartaatini pingasuni aasap ingerlanerani Issittup imartaatigoortussani igaassat akussallu nunatsinneersut atorlugit kusanasaarlugit illinnartuliortuunissamik HX Expedition isumaqatigiissuteqarfigaa. Tassa kalaallit igasut umiarsuarni takornariartaatini taakkunani igaassat akussallu nunatsinneersut atorlugit nerisassiortassapput. Taakkua kusanasaarlugit illinnartuliarisartagassaat, Inunnguaq Hegelundip isumassarsiaralugillu pilersitarai.

Kalaallit igasut igaassat akussallu nunatsinneersut atorlugit kusanasaarlugit illinnartuliaminnik umiarsuarmi takornariartaammi Fridtjof Nansenimi arfininngorpat maajip ulluisa 24-anni sassaalleerngaassapput.

Nerisassiarisartagassaat assigiinngitsut 36-iussasut

Inunnguaq Hegelundip igaassat akussallu nunatsinneersut atorlugit assigiinngitsunik 36-nik, tassa ullup qeqqasiutinik, unnukkorsiutinik immikkullu oqattaarutissanik assigiinngitsunik tallimanik ataatsimut sassaallerutissanik kusanasaarlutik nerisassiortarnissamik HX isumaqatigiissuteqarfigaa.

- HX-ilu siorna misiliummik suleqatigiippugut, suleqatigiinnerpullu iluatsilluangaarmat aasap naanissaata tungaanut sivitsorparput, taanna tusagassiorfimmi nalunaarummi issuarneqarpoq.

Nerisassiarisartagassaasa 30-40 procentiisa missaat igaassat akussallu soorlu aalisakkat qaleruallillu nunatsinneersut atorlugit kusanasaarlugit illinnartuliarisarumaaritik igasorpaaloqatinilu aamma nunatsinneersuut taakkuninnga piareersaaqatigisassagini, Ilannguaq Hegelund oqarpoq.

- Inunnguaq igasullu kalaallit allat suleqatigalugit igaassat akussallu Kalaallit Nunaanneersut atorlugit kusanasaarlugit illinnartulianik ilaasutsinnut sassaalliisalertussanngornerput tulluusimaarutigeqaarput, HX Expeditionsip akunnittarfinnut tunngasuni ingerlatsinermut pisortaa Stefan Engl tusagassiorfinnut nalunaarumminni oqarpoq.

Laasi, Eli aamma Jørgine ilaassasut

Kalaallit igasut umiarsuit takornariartaatit nunatsinnukartinnagit kusanasaarlugit illinniartuliarisartagassatik piareersariartorlugit umiarsuarnut taakkununnga Reykjavikimi Svalbardimiluunniit ikiartortassapput.

Laasi Biilmann, Eli Nuka Johannson aamma Jørgine Tobiassen umiarsuarni takornariartaatini Fridtjof Nansenimi, Framimi Spitsbergenimilu nerisassiortuusassapput. Umiarsuit taakkua kingoraartaallutik septembarip naanerata tungaanut Issittup imartaatigoortassapput.

Igaassat akussallu nunatsinneersut atorlugit nerisassiat piumaneqarneruleraluttuinnarput. Taamaammallu HX Ekspeditionsilu suleqatigiilertussanngornertik igaassat akussallu nunatsinneersut atorlugit kusanasaarlugit asseqanngitsunik illinnartulianik nunanit tamalaaneersunut sassaallertarnissamut periarfissatsialaalluinnartutut Inunnguaq Hegelundip oqaatigaa.

- Suleqatigiilertussanngornerput anginngitsunik suliniutillit ilarpaaluisa anginerumaanik suliniutilinnik suleqatitaartornissaannut ammaassisuusinnaalluarpoq. Assersuutigiinnarlugumi qallunaat kusanasaarlugit nerisassiaat ukiut 20-t matuma siorna eqqartorneqarnerluunniit ajorput.

- Københavnip kusanasaarlugit ullutsinni illinnartuliortartunit ornigarneqarnerpaasartunut ilaanini ilisimaneqaatigaa. Nunarpullu tamatumani ilanngunnissaa ilimanaateqarpoq, ilannguteratarsinnaanissaanullu ikiuussinnaagama nuannaarutigaara, Inunnguaq Hegelund oqarpoq.

Ilannguaq Hegelundip Arctic Food by I-mik piginnittuusup igaassat akussallu nunatsinneersut atorlugit nerisassianik nittarsaassinerup saniatigut suliffissanik nutaanik pilersitserusullunilu nunatsinni inuussutissalerinermik siuarsaaqataarusuppoq.