Kalaallisuut iverutinut atoqqinneqartut

Kunngu Sørensen qiimasuuvoq illarasaartuulluni uummaarissorujussuullunilu. Tusagassiortup Københavnimi Nørreportimi qimuttuitsut unittarfiata eqqaani kaffisorniartarfimmi naapippaa tupinnaqisumik iverusiornermut kalaallisuunik atoqqiisalersimanera paasisaqarfigiumallugu.

- Kamimma aappaa kaffimik kuisoorpara, igikkusunngilakkali, Kunngu qungujulluni oqarpoq.

Apriilimi upernarissinerani seqinnarippoq Københavnillu qeqqani allamut kalippaanga, tassani iverusiassaminut atortussaminik aallerniarami, najukkamini nunarsuarmilu tamanit takornarianut tuniniagassaminik.

Naqqup ataani pisiniarfimmut aterpugut, tassanilu qalipakkat, marriat, tippiliat pinnersaatillu tuniniarneqarput. Eqqumiitsuliortut assigiinngitsut tassanilu suleqatigiillutik suliaminnik tuniniaasarput.

- Atortussannik Danmarkimi ilusilersuisartunit mikisunit pisisarpunga, taakkumi uattulli aallarnisaasuaraapput. Atortussiassanik tunisassiornermi meeqqanik sulisoqarsimannginnissaa aamma qulakkeertarpaat, Kunngu iverusiortunngornissaminik takorluugaqanngisaannarsimasoq oqarpoq.

- Narsarsuarmi 2022-mi orlugama seeqquara ujaqqamut inngigissumut sequmillugu. Suliaritinnginninni qaammatini marlunni angerlarsimaannarnissara iluarinngitsorujussuuara, taamaammallu iverusiornissamut artortorpassuarnik pisillunga.

Kunngu nalinginnaasumik annoraaminernik amernillu mersortarsimavoq Narsarsuarmili pisiassaqanngilaq. Taamaammat Greenland Ruby rubininik mikisunik sapangaateqarnersoq aperisimavaa 100-llu missaannik pisilluni.

- Suliakka Facebookimi takutippakka ingerlaannarlu tunillugit. Napparsimaninni aliikkutassaqaannartussaagaluarpunga. Massakkulli ukioq ataasinngorpoq tamakkiisumik inuussutissarsiutigilerakku , Kunngu oqaluttuarpoq.

Pinterest Canadamiullu iverutaat

Kunngu Sørensen assigiinngitsorpassuarnit isumassarsiortarpoq. Canadami Inuit sapannganik iverusiaat takusimavai Kalaallit Nunaanni annikinnerusunik qanoq sananeqarsinnaanersoq eqqarsaatigisimallugu. Ilutigitillugu inoqatinut attaveqaat »Pinterest« isumassarsiorfigisarpaa najukkaminilu aallarnisaasuaqqat allat oqaloqatigisarlugit iverutinik ilassaanillu assigiinngitsunik ineriartortitseqatigiittarlutik.

- Siummi ikkutiinnartakkat nalinginnaasorujussuupput. Sanasartut oqaluttuuppakka arnat suut nuannarineraat. Assersuutigalugu pingaartumik kalaallit arnartaasa aappaluttortallit qaqortortallillu nuannarisarpaat. Taamannak sulineq nuannersorujussuuvoq.

Qanoq tunisassiortigisarpit ullumikkut?

- Uagutsinni nerriverujussuaq iverusiassanut atortut ilaannik guultinik, siilvinik ujaqqanillu ulikkaavippoq.

- Pisisartut nunanit allaneersuunerusut rubininik diamantitalinnik guultitalinnillu pisisarput. Kalaallit kalaalerpaluttunik pisinerusarput, soorlu avittanik, oqarpoq.

Kaffisugaq allanngortitsisoq

Kunngu Sørensen siornatigut takornariaqarnermik ineriartortitsinermi namminersortuusimavoq, tassani allat peqatigalugit takornariaqarnermik inuussutissarsiuteqartunik pikkorissaanermik workshopertitsinernillu ingerlataqarluni. Maanna nammineq namminersorpoq kalaallillu iverusiaannik ilaatigut takornarianut tunisisarluni.

- Apersortikkamali kamikka iluarsaanniarlugit kaffi kuisoorpara. Kamiit taakku atoqqinneqarsinnaanngillat simerninimmata. Taamaalinerani iverusiorninni aalisakkat amii atugarilereerpakka.

- Kalaallisuuma kamittai qanoq atoqqissinnaanerlugit eqqarsaatigaara. Kalaallisuuvut kusanartorsuupput suliarujussuullutillu. Nammineq avittaraangama suliarujussuusarpoq. Taamaammat igiinnarusunngilakka, nassuiaavoq.

Avittat qalipaatai Kunngup qalipaqqippai pisoqalisimallutik qalipaataarussimammata. Siullermik qiortarlugit misilissimavaa kusanaagisimallugilli.

- Naqillugit killuutinik kalaalerpalussinnaasunik ilusilinnik ujaasillunga misissuivunga. Killuutit amermut kaattarneqartarput kusanarluinnartunillu assigiinnik angusaqarfiullutik. Nipitittarpakka iveruserlugillu. Ila kusanaqaat.

Atoqqiisarneq Kunngup nuannarisorujussuuaa, kisianni iverusiami allanit aamma ilaarneqarnerat nuannaarutigalugu.

- Kalaallisut igiinnarnagit atoqqinneqartarnerat pitsaasuuvoq. Suut igiinnarnagit qanoq atoqqinneqarsinnaanersut eqqarsaatigisalernikuuara.

Pisiniarfiutitaarusuttoq

Kunngu Sørensen oqaluttuarpoq kalaalerpassuarnit tapersersorneqartarluni qanorlu aamma iversusiorsinnaanerminik siunnersorneqartarluni.

- Sanaakka nalinginnaasumik Facebookiga aqqutigalugu tunisarpakka kisiannili aamma poorskimi juulimilu niuffatsitsinerni. Sikuki Harbourimi Informationscenterimi ukiut marluk matuma siorna aamma takornariartaassuit tikikkaangata tuniniaasalerpugut. Paarnannguaq Tittussen suleqatigaara, taassumalu tassani tuniniaaneq isumagisarpaa.

Kunngu Paarnannguarlu iverusiaminnik tuniniaavigisinnaasaminnik pisiniarfissarsiorsimagaluarput. Ajornaqaarlu. Akisoqaaq, aallarnisaasuaqqanullu tamanna ajornaqaluni.

- Nuuk Centerimi pisiniarfissiniarlunga eqqarsaatigigaluarpara kisianni akisuallaaqaaq. Uatsinnut aallarnisaasuaqqanut nalinginnaasumik tapersersuineq annikippallaarpoq. Periarfissaritinneqartut allaffissornertaqarpallaarput, Excel-imik immersuinissamut, aningaasaqarnermut qinnuteqaasiornermullu immikkut ilisimasaqapajaartussaassallutit. Tamakku sapinngilakka, kisianni allammi uattulli misilittagaqanngitsut, aperaaq.

Taamaammat aningaasartuutit amerlavallaartinnginniarlugit sanaartortartut assigiinngitsorpassuit ataatsimut pisiniarfiuteqarsinnaanerat takorloorpaa. Isumassarsianili nalorninartoqartippaa atortuutini akisoorujussuusinnaammata.

- Taamaaliorniaraanni inuit tatigisinnaalluinnartariaqarpavut. Malaysia aallarnisaasuaqqanut sumiiffimmik sanasimavoq tamanut parnaartartunik aningaasaasivilinnik. Assingusumik peqarsinnaassagaluarami. Inersuaq assigisaaluunniit pisiniarfeerarpassualimmik, Kunngu Sørensen naggasiivoq.