Kalaallit Airportsip taxat akitsuuserpai
Illoqarfiup taxai, angalasussanik timmisartoqarfimmukaassineranni tikittunillu timmisartoqarfimmiit angallassinerannilu, biilinut inissiinermut Kalaallit Airportsip akitsuusersorniarpai.
Timmisartoqarfimmut timmisartoqarfimmiillu Nuup Taxip taxaanut ilaagaanni maajip aallaqqaataaniit 20 koruuninik immikkut akiliisoqartalissaaq.
- Akit allanngunnginnissaat kissaatigigaluarparput, maannami suut tamarmik akitsoraluttuinnarput. Kalaallit Airportsilli ilisimatippaatigut biilinut inissiinermut akitsuut nutaaq maajip aallaqqaataaniit atuutilersinniarlugu. Tamannalu atuisunit akilerneqartariaqarpoq, Nuuk Taximi pisortaq Janus Eigaard Sermitsiaq.AG-mut oqarpoq.
Kikkut akiliissappat?
Akitsuut nutaaq akilerumallugu taxap akiata aallarniutaa qaffassanersoq isumaliutersuutaasimavoq, taamaalillutik taxanik atuisut tamarmik akiliinerusalissallutik.
- Isumaqarpugut aningaasanik pissarsiniarnermi timmisartoqarfimmukarniartut timmisartoqarfimmiillu ilaaniartut immikkut akiliuteqartinnissaat naapertuilluarnerpaasoq, pisortaq nassuiaavoq.
Aaqqiissutissarli tamanna taxaatilinnut akisussaaq, tassami akitsuut nutaaq atuutilersinniarlugu naatsorsueqqissaarnermik atortorissaarutit ineriartortinneqartariaqarput.
Nuuk Taxi qaammammut 6.000-it missaannik timmisartoqarfimmut ingerlassisarpoq, taamaattumik akitsuut aningaasarpassuarnik naleqassasoq, Janus Eigaardip oqaatigaa.
Timmisartuutileqatigiiffiup taxanik angallassisut mittarfimmukarnerminni unikkaangamik tamatigut 10 koruuninik akiliisittarniarpai. Nuuk Taxi marloriaammik akiliisitsisariaqalersimavoq, tassami ingerlatseqatigiiffiup naatsorsuutitigut atortorissaarummik immikkut ittumik akitsuummik ingerlatsisinnaasumik ineriartortitsinermut aningaasartuutit matussusertariaqassammagit.
Illoqarfimmut aqqut naanneq
- Angalasut taama akiliisinneqarnissaannik piumasaqarnissarput nuannarinngilarput, kisiannili ataatsimik nuannaarutissaqarpugut. Naatsorsuutigaarput timmisartoqarfiup nutaap inissisimaffia pissutigalugu mittarfimmit illoqarfimmut taxamik ingerlanneqarneq sivikinnerulerumaartoq, taamaattumik maannakkutut akigitinneqartoq assigissavaa, immaqalu 1-2 koruuninik akikinnerussalluni, naak akitsuut nutaaq 20 koruuni ilaagaluartoq, Janus Eigaard oqarpoq.
Nuuk Taxip paasisimavaa taxat unittarfimmut inissittut tamarmik nummerpladii assilineqartarumaartut, akiligassarlu taxaatilinnut tunniunneqartarumaartoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...