Christiansborg
Kalaallit ilinniartut suliffeqarfinni pisortat naapissavaat
Kalaallit Nunaata inuussutissarsiornikkut siunissaa Folketingimi oqalligisineqalerpat ilinniartut peqatigiiffii Avalak aamma Ili Ili aaqqissuussaqassapput
Kalaallit Nunaat 2025-mi qanoq isikkoqassava?
Inuit Ataqatigiit Folketingimi aamma ilinniagaqartut peqatigiiffii Avalak kiisalu Ili Ili suleqatigiinneratigut inuussutissarsiorneq pillugu oqallititsissapput. Tamanna Christiansborgimi ingerlanneqassaq.
Suliffeqarfiit
Kalaallit ilinniagaqartut 40-t danskit Folketingianni naapeqatigiissapput. Tassani siunissamik takorluuilluni isumasioqatigiinnermut 'Kalaallit Nunaat 2025'-mut peqataasutut, Kalaallit Nunaata siunissaa, Folketingimut ilaasortaq Aaja Chemnitz Larsen aamma inuutissarsiutinik ingerlatsisut Kalaallit Nunaanneersut peqatigalugit oqallisigissavaat.
Inuussutissarsiutinik ingerlataqartunit ilaatigut peqataassapput Sulisitsisuni pisortaq Brian Buus Pedersen, Greenland Holdingimi pisortaq Karsten Høy, Royal Greenlandimi pisortaq Mikael Thinghuus, aamma Visit Greenlandimi pisortaq Anders Stenbakken.
Kalaallit Nunaanni inuussutissarsiutinik ingerlatsisunit peqataatitat ullup pilersaarusiornerani annertuumik sunniuteqarput – tassami ilinniartut suleqatigiinnguakkuutaarlutik Kalaallit Nunaanni inuussutissarsiornermi 2025-p tungaanut ajornartorsiutaasut immikkuullarissut pillugit aaqqissuutaasinnaasaannik siunnersuusiussapput. Ilinniartut suleqatigiit ullormi tassani pitsaanerpaamik siunnersuusiortut akissarsitinneqassapput.
Attaveqarnerulernissaq
Aaqqissuussap ingerlanneqarnissaa qilanaarineqarluarpoq:
- Aaqqissuussineq una assut nuannarivarput, kalaallit ilinniagaqartut Nunatsinni inuussutissarsiutinik ingerlatsisut ilaannik naapeqateqarfigisinnaasaat. Neriunarpoq tamanna Kalaallit Nunaanni inuussutissarsiutinik ingerlatsisut kalaallillu ilinniagaqartut Danmarkimiittut akornanni attaveqatigiillualernermik nassataqarumaartoq, isumaqarpugullu tamanna siunissami tamanut iluaqutaassasoq, Avalammi siulittaasoq Bjørk Lange Kristensen oqarpoq.
Københavnimiinnaanngitsoq
Danmarkimi kalaallit ilinniagaqartut peqatigiiffiat Avalak aamma Nunatsinni ilinniagaqartut peqatigiiffiat Ili Ili suleqatigiilluarnerulernissaat Ili Ili-mi siulittaasup Vivi Voldip neriuutigaa.
2016-ip ingerlanerani Kalaallit Nunaanni ilinniartunut siunissamik takorluuiluuni isumasioqatigiinnermik assingusumik aaqqissuussisoqassaaq, tassanilu kalaallit politikerit, inuutissarsiutinik ingerlatsisut kattuffiillu assigiinngitsunik ilinniagaqartut peqatigalugit peqataanissamut aggersarneqassapput.
Siumup Folketingimi ilaasortaatitaa Aleqa Hmmond aamma siunissaq pillugu takorluuilluni isumasioqatigiinnissamut 19. september qaaqquneqaraluarpoq, allanilli pisassaqarluni peqataasinnaanani nalunaarluni.