Illersornissaqarfiup
Kalaallit Nunaanniittarnini annertusivaa, aamma inuit
attaveqaqatigiittarfiisigut.
Ulluni makkunani asserpassuit videorpassuillu
siammarterneqartarput, soorlu qallunaat timmisartui F-16-it Kangerlussuarmut
ingerlaartut, sakkutuut timmisartuisa qulimiguuliit Sermersuaq qulaakkaat,
sakkutuut immikkut sungiusarsimasut kigaallassaammik atuinermik aamma
silaannarmiit nunamut ingerlaarnermik sungiusartut.
Illersornissaqarfiup
Kalaallit Nunaanniittarnini annertusivaa, aamma inuit
attaveqaqatigiittarfiisigut.
Ulluni makkunani asserpassuit videorpassuillu
siammarterneqartarput, soorlu qallunaat timmisartui F-16-it Kangerlussuarmut
ingerlaartut, sakkutuut timmisartuisa qulimiguuliit Sermersuaq qulaakkaat,
sakkutuut immikkut sungiusarsimasut kigaallassaammik atuinermik aamma
silaannarmiit nunamut ingerlaarnermik sungiusartut.
Tamatuma saniatigut
Kujataani umiarsuaq innuttaasunut ammatinneqarlunilu Nuummi sakkutuut
nunaqavissullu arsaallutik unammisimapput.
Najuunneq annertunerusoq
Danmarkip Kalaallit Nunaanniinneranik Naalagaaffeqatigiinnermilu
isumannaatsuunermik isumaginninneranik nunanut allanut, immaqa ingammik Det
Hvide Husimut, nalunaaruteqarnissaq pineqarnersoq eqqarsaatigineqarsinnaavoq. Illersornissaqarfiup inuit attaveqaqatigiittarfii atorlugit sammisassat,
sungiusarnerit assigisaallu pillugit nalinginnaasumik
attaveqatigiittoqartartoq, Illersornissamullu Sakkutooqarfiup Kalaallit
Nunaanniinnerujartornera pissutigalugu Kalaallit Nunaanni sammisassat pillugit
Illersornissaqarfiup inuit attaveqaqatigiittarfii atorlugit attaveqatigiinneq
annertusisimasoq Issittumi Sakkutooqarfimmit oqaatigineqarpoq.
“Najuunnerput pillugu nalunaarutiginninnerup saniatigut aamma umiarsuarmik
innuttaasunut ammatitsivugut. Aamma illersornissaqarfiup
immikkoortortaqarfiinit tikeraartoqarnissaanik kalerrisaarivugut,” Issittumi
Sakkutooqarfik Sermitsiamut allappoq.
USA-mut oqariartuuteqartoq
Illersornissaqarfiup Kalaallit Nunaanniinnaanngitsoq aammali Danmarkimi
maluginiarneqarnerulersimanera Illersornissaqarfimmi lektorip Peter Viggo
Jakobsenip aamma maluginiarpaa.
– Bornholmimi innuttaasunik ataatsimiititsinermi Illersornissaqarfiup
peqataanera aamma malunnarpoq. Assersuutigalugu siornatigut umiarsualivimmi
atortussanik inissiisinnaatitaaneq ajorput. Ukioq mannali
taamaaliortariaqalerput. Tamatuma saniatigut innuttaasunik ataatsimiititsinermi
timmisartut sorsuutit F-16 aamma F-35 takutinneqarlutik. Isumaqarpunga tamanna
innuttaasunut ataatsimut periusissiamik attaveqartitsinermut ilaasoq,
illersornissaqarfiup pingaaruteqassusianik takutitsinissamik siunertaqartumik,
tamannalu naalakkersuisut illersornissaqarnermut ”pisiniarit, pisiarit,
pisiarit”-mik oqariartuutaannut attuumassuteqarpoq. Illersornissaqarfiup
inuiaqatigiinni annertunerusumik inissisimaffeqalernissaanik innuttaasunut
paasinarsisitsiniaaneruvoq.
- Sakkutuut iluanni pisinnaasat tamarmik Kalaallit Nunaannut
aallartinneqarpata, aamma inuit attaveqaqatigiittarfii atorlugit
saqqumilaartitsisoqarpat, tamanna aamma Atlantikoq qulaallugu Danmarkip
iliginnittuunnginneranik ersersitsinissamik siunertaqarnermik pissuteqartoq
qularutissaanngilaq.
Atortut nungullartut
Peter Viggo Jakobsenili naapertorlugu sakkutuut Kalaallit Nunaanni taama
ersaritsigisumik najuunnissaat killeqarpoq.
– Taamatut ingerlaannarsinnaanngilluinnarput, tamatuma qaavatigut NATO-mut
allanullu sakkutooqartitsiniarunik taamaaliorsinnaannginnamik. Tamatuma
peqatigisaanik timmisartut qulimiguuliit assartuutit angisuut namminneq nukik
atorlugu Kalaallit Nunaannut utimullu timmisartortarnerat
nungullarnartorujussuuvoq. Maannakkorpiarli ersarissumik
oqariartuuteqarusupput. Tamatuma kingorna pissusissamisoortumik
inissiisoqassaaq, Peter Viggo Jakobsen naliliivoq.
