Tyrkia nunarsuaq tamakkerlugu takornarianit millionilinnit sulinngiffeqarluni angalaffigissallugu nuannarineqarluarpoq. Imaq nalunnguarfigissallugu kissalaartoq, aasaaneranilu 30-40 gradit akornanni kiattarnera pissutigalugit. Kalaallit ilaqutariippassuit ukiut tamaasa nunamut, ilaatigut nerisassatitik alutornarluinnartut kulturikkullu misigisassat puigunaatsut pillugit tusaamaneqartumut, aasarsioriartarput.
Nunanili Skandinaviamiittunut sanilliullugu Tyrkiami inuuniarnernikkut atukkat ilungersunarnerupput akissarsiallu appasinnerullutik, tamattumillu akunnittarfinni neriniartarfinnilu sulisut amerlasuut, suliffimmi atugassarititaasut pitsaanerusut inuuniarnermillu atukkat oqinnerusut ujartorlugit, nunanut allanut aallartarput.
Tyrkia nunarsuaq tamakkerlugu takornarianit millionilinnit sulinngiffeqarluni angalaffigissallugu nuannarineqarluarpoq. Imaq nalunnguarfigissallugu kissalaartoq, aasaaneranilu 30-40 gradit akornanni kiattarnera pissutigalugit. Kalaallit ilaqutariippassuit ukiut tamaasa nunamut, ilaatigut nerisassatitik alutornarluinnartut kulturikkullu misigisassat puigunaatsut pillugit tusaamaneqartumut, aasarsioriartarput.
Nunanili Skandinaviamiittunut sanilliullugu Tyrkiami inuuniarnernikkut atukkat ilungersunarnerupput akissarsiallu appasinnerullutik, tamattumillu akunnittarfinni neriniartarfinnilu sulisut amerlasuut, suliffimmi atugassarititaasut pitsaanerusut inuuniarnermillu atukkat oqinnerusut ujartorlugit, nunanut allanut aallartarput.
PAASISAT
Nunatta avataaniit suliartortumut ilaqutaasunut piumasaqaatit sakkortusineqarnissaat siunertaralugu Naalakkersuisut inatsimmik allannguutissatut siunnersuummik nutaamik maannakkut suliaqarput, taamaalilluni taakku nunatsinni sulisinnaalissagunik kommunimut akuersissummik qinnuteqaqqaartariaqartut inatsissatut alluunngutissami piumasarineqartalissaaq.
Nunatta avataaneersut sulilersinneqannginnerini sulisussat Kalaallit Nunaanneersut atorfimmut qinnuteqarnissamut periarfissinneqartarnissaat inatsisissamik sukaterinikkut qulakkeerniarneqarpoq, taannalu lnatsisartut ukiaq manna ataatsimiinneranni saqqummiunneqarnissaa pilersaarutaavoq.
Kilde: Naalakkersuisut.
Taama oqarpoq Alanyami akunnittarfinni neriniartarfinnilu saqisutut bartenderitullu ukiuni 15-ini sulisimasoq 37-nik ukiulik Masuk Celik. Tassuma ilaqutai ikinngutaalu arlallit Europami nunani assigiinngitsuni suliffittaarnikuupput, taassumali Kalaallit Nunaanni suliffittaarnissani neriuutigaa.
Nalaatsornerinnarmik naapinnerit
Masuk Celik, tyrkisk-kurderiusoq, nunap kujasinnerusuata sineriaani illoqarfiit takornariarfiit pingaarnersaanni Alanyami sulinermini takornariarpassuarnik nunanit assigiinngitsuneersunik naapitsisarsimavoq. Ukiunili kingullerni kalaallinik aasarsioriarsimasunik nalaatsornerinnakkut naapitsisarnermigut Kalaallit Nunaanut soqutiginninnera alliartulersimavoq.
- Kalaallit takornarianit tusindilikkuutaanit Alanyami naapittakkatsinnit allaanerupput. Inussiarnersuupput saamasuullutillu, taamaattumillu nunatsinni aamma nuannarineqartaqaat, tamannalu pissutigalugu nunagisaat nunarsuup avannaarsuaniitoq kulturiallu pillugit paasisaqarusuttarpugut.
- Nunani allani akunnittarfinni neriniartarfinnilu sulilersinnaanissara ammaffigisimavara, aatsaallu ukiuni kingullerni kalaallinik naapitsisalerama, nunallu ineriartornera pissanganartoq pillugu nuannersorpassuarnik tusagaqarfigisalerlugu, Kalaallit Nunaat soqutigiartulersimavara, taanna oqarpoq.
Internet atorlugu kalaallit oqaluttuarisaanerat kulturiallu misissorsimallugit, aammalu kalaallit ilisarisimalersimasani akuttunngitsumik attavigisarini oqaatigaa.
- Misissuinerma takutippaa Kalaallit Nunaanni akunnittarfinni neriniartarfinnilu pitsaassutsit qaffasissorujussuusut, akunnittarfimmilu neriniartarfinnilu sulinermik misilittagaqarluarama qularutiginngilara Kalaallit Nunaanni takornariaqarnerup ineriartorneranut tunniussaqarsinnaallunga, Masuk Celik oqarpoq.
Tyrkiamiorpassuilli nunanut allanut suliffissarsiortarnerat misigisassarsiornerinnarmik aallaaveqanngitsoq erseqqissaatigaa.
Pissutsit ilungersunartut
Tyrkiami takornariaqarnerup iluani akunnittarfinnilu sulisut ullormut 10 tiimit missaanni sulisarput, aasaanerani ulapaarfiup nalaani sivisunerusumik sulisarnerat naliginnaasuuvoq. Taakku qaammammut 20.000 aamma 30.000 tyrkiske lirat missaanni akissarsisarput, aningaasallu koruuninngorlugit 3.900 aamma 5.900 koruunit missaanniipput.
Kalaallit Nunaannut suliffissarsiortut killilersimaarnissaat pillugu lnatsisartut inatsisaat naapertorlugu sulisitsisoq nunatta avataaneersumik atorfinitsitsissaguni, kommunimi Majoriaq aqqutigalugu kommunalbestyrelsimut akuersissummik qinuteqaqqaassaaq, akuersissullu taamaallaat piffissami killilimmi sivisunerpaamik ukiuni marlunni atuuttussanngorlugu tunniunneqarsinnaavoq.
Assi: Leiff Josefsen
- Tyrkiamiut suliumatuujupput ullormullu akunnerpassuarni sulisarlutik, naallu nunaqarput takornariaqarfissuugaluartoq tamaani inuuniarneq oqimaassinnaasarpoq.
- Ikinngutikka ilaquttakkalu amerlallit ilaatigut Danmarkimut, Sverigemut Norgemullu nuunnikuupput, taakkualu oqaluttuaat naapertorlugit sulinermi inuuniarnermilu atukkat pitsaasuupput, Kalaallit Nunaannilu suliffittaarnissara pillugu takorluukkama piviusunngornissaa neriuutigaara, Masuk Celik oqarpoq.
Ineqarnermut innaallagissamut allanullu akiligassat akilerneqareeraangata qaammatip sinneranut aningaasat ikittuinnaat sinneruttartut, tamatumalu nunanut killernut allanut sanilliullugu Tyrkiami inuuniarneq oqimaannerusinnaasoq takutikkaa, taanna isumaqarpoq.
Sulisussat pisariaqartinneqartut
Hotel Sisimiut & Tours ukiumut 50-it missaannik sulisusoqartarpoq, taakkunanngalu 40 procentiisa missaat, tassa 20-t missaanniittut, nunanit allaneersuupput. Suliffeqarfiup pisortaa piginneqataasorlu Annette Lings naapertorlugu, sulisussat amigaatigineqartut 15 procentit missaanniipput.
- Suliffeqarfiutitsinni sulilissagaanni piumasaqaatit qaffasissuunngillat, nunaqavissullu qinnuteqartut itigartinneqartartut ikittuinnaapput.
- Suliassagut tamaasa naammassissagutigit sulisut nunanit allaneersut pinngitsoorsinnaanngilagut.
- Inunnik kiffartuussinermik suliaqarpugut, suliffeqarfippullu maannakkutut ingerlassappat nunatta avataaneersut nunatsinnullu tunniussaqarusuttut pinngitsoorsinnaanngilagut, taanna oqarpoq.
Hotel Sisimiut & Tours-imi inuiaat assigiinngitsut arfineq-marluk sulisorineqarput.
